«Անկախ նրանից, թե 2018թ. ով կլինի վարչապետ, անկախ վարչապետի անձից, դուք գործ կունենաք…». Էդուարդ Շարմազանով
«Կառավարությունը, որի քաղաքական պատասխանատուն ՀՀԿ-ն ու ՀՅԴ-ն են, ներկայացրել է այս ծրագիրը, որը մենք մանրամասն քննարկել ենք թե՛ մեր հարազատ ՀՀԿ-ում, թե՛ մեր կոալիցիոն գործընկերների հետ»,- այսօր ԱԺ-ում այս մասին հայտարարեց խորհրդարանի փոխնախագահ, ԱԺ ՀՀԿ խմբակցության պատգամավոր Էդուարդ Շարմազանովը՝ նշելով, որ այսօր մենք ունենք արտաքին ու ներքին բազմաթիվ մարտահրավերներ, և ըստ նրա՝ կառավարության ներկայացրած ծավալուն փաստաթղթի մեջ հստակ ներկայացված են այդ մարտահրավերներին դիմակայելու ուղիները։
«Մենք ունենք մի հանրապետություն, որը 17%-անոց թոքերով է շնչում. մեր սահմանների 83%-ը փակ է։ Մենք շրջափակման մեջ ենք, ունենք անվտանգության խնդիրներ, և դրան էլ գումարվում է ահաբեկչության մարտահրավերը։ Հայաստանից մինչև Սիրիա ընդամենը մի քանի հարյուր կիլոմետր է։ Մենք՝ որպես քաղաքական իշխանություն, պարտավոր ենք բոլոր բացասական սցենարները նայել։ Թիվ մեկ հարցը ՀՀ-ի և ԱՀ-ի անվտանգությունն է։ Դա ներառված է ծրագրում։ Եվ պատահական չէ, որ ՀՀԿ-ն ընտրությունների գնաց «Անվտանգություն և առաջընթաց» կարգախոսով։ Առանց անվտանգության կայուն և մրցունակ համակարգի՝ մենք չենք կարող լուծել ո՛չ տնտեսական, ո՛չ սոցիալական, ո՛չ ժողովրդավարական խնդիրներ։ Այդ առումով, այո, դեռ երկար ժամանակ ՀՀ-ի համար առանցքային խնդիրը պետք է լինի անվտանգության մրցունակ և կայուն համակարգ ունենալը»,- ասաց Շարմազանովը։
Նա նշեց, որ Արցախի խնդրի լուծման մասին կառավարության ծրագրում թեև մեկ տողով է գրված, բայց ըստ նրա՝ շատ դիպուկ է. «Ուղիներն էլ են նշված։ Դուք գիտեք, որ կա 3 սկզբունք՝ տարածքային ամբողջականություն, ուժի չկիրառում, ինքնորոշման իրավունք։ Այս ծրագրում կառավարությունը հստակ նշել է ժողովուրդների ինքնորոշման իրավունքը։ Քաղաքական իշխանությունը ևս մեկ անգամ հաստատում է, որ Արցախի կարգավիճակը, Արցախի ժողովրդի ապագան նախ և առաջ պետք է որոշի Արցախի բնակչությունը։ ՀՀ-ն՝ որպես Արցախի Հանրապետության անվտանգության երաշխավոր, ջանք չի խնայելու, որ բանակցությունների միջոցով հասնենք ԱՀ-ի դե յուրե միջազգային ճանաչման, նաև՝ հզորացնելով մեր մարտունակությունը՝ պահպանենք մեր քույրերի և եղբայրների անվտանգությունը»։
Նա նշեց, որ Հայաստանի հարաբերությունները պետք է շարունակեն խորանալ ՌԴ-ի հետ, միևնույն ժամանակ, նաև՝ ԵՄ-ի հետ. «Դա, իհարկե, հնարավոր է, և արդեն նախաստորագրված փաստաթուղթը դրա ապացույցն է»։
Վերջում հավելեց. «Քանի որ իմ ընդդիմադիր գործընկերներին շատ է հետաքրքրում 2018թ. իշխանության ճակատագիրը, պետք է ասեմ, որ մենք արդեն խորհրդարանական հանրապետություն ենք, և 2017թ. ժողովրդի մեծամասնությունն իր վստահության քվեն տվել է քաղաքական կոալիցիոն ուժերին՝ ՀՀԿ-ին՝ Սերժ Սարգսյանի գլխավորությամբ, և ՀՅԴ-ին։ Հետևաբար, անկախ նրանից, թե 2018թ. ով կլինի վարչապետ, անկախ վարչապետի անձից, դուք գործ կունենաք մեր կուսակցության հետ՝ նախագահ Սարգսյանի գլխավորությամբ»։
