«Հաճախակի ենք նման ժարգոնային բառապաշարի ականատես լինում». Վահրամ Բաղդասարյան

ԱԺ-ում քննարկվում է «Կոռուպցիայի կանխարգելման հանձնաժողովի» մասին օրինագիծը: Նորաստեղծ հանձնաժողովի անդամներին առաջարկելու են քաղաքական ուժերը, ընտրելու է Ազգային ժողովը: Ենթադրվում է, որ անդամներից միայն մեկին առաջադրելու իրավունք կունենա ընդդիմությունը: Այս հարցերի շուրջ զրուցել ենք ՀՀԿ խմբակցության ղեկավար Վահրամ Բաղդասարյանի հետ

– Եթե կոռուպցիայի կանխարգելման ապագա հանձնաժողովում ընդդիմադիրներին առավել խոշոր դերակատարում չի տրվում իշխանավորների նկատմամբ, ինչքանո՞վ արդյունավետ կաշխատի այդ հանձնաժողովը:

– Ես անկեղծ ասեմ` կատեգորիկ դեմ եմ եղել «իրավունքներ` առանց պատասխանատվության», «վերահսկողություն` առանց պատասխանատվության» մոտեցմանը:

– Բայց այս դեպքում ընդդիմադիրներն ավելի շահագրգիռ կլինեն արդյունավետ աշխատելու:

Կարդացեք նաև

– Մենք ընդառաջ ենք գնում և անպայման կընդունենք այդ դրույթը, և իրենք իրենց ներկայացուցիչը կունենան, բայց մի փոքր ընդունելի տարբերակ չեմ համարում: Պատկերացնո՞ւմ եք` ոչ մի պատասխանատվություն չունենան և ունենան վերահսկողություն: Ես կարծում եմ` դա վտանգավոր հետևանքներ կարող է ունենալ: Բայց իրենց ընդհանրապես հեռացնել այդ հանձնաժողովից, ես դրան այդքան կողմնակից չէի, և դա էր պատճառը, որ քննարկումների արդյունքում որոշվեց՝ ընդդիմությունն ունենա իր ներկայացուցիչը:

– Ի՞նչ վտանգավոր հետևանքների մասին եք խոսում:

– Հանիրավի անընդհատ իշխանության դեմ, առանց հիմնավորումների, լուտանքներ, քննադատություններ, և այլն: Եվ պատկերացնո՞ւմ եք, եթե պատասխանատվություն չկրող մարդիկ վերահսկողության գործառույթ ունենան, ինչ խառնաշփոթ կարող է ստեղծվել: Ինձ թվում է, որ այդ կառույցն ընդհանրապես պետք է լինի ապաքաղաքականացված: Եվ պետք է այդ բառի բուն իմաստին հասնենք, ի վերջո: Նման մարմինները պետք է լինեն ապաքաղաքական:

– Բայց եթե քաղաքական մեծամասնությունն է առաջադրելու և ընտրելու հանձնաժողովի անդամներին, դա մի՞թե հնարավոր է:

– Դրա համար այդ մեխանիզմն այնպես պետք է ընտրենք, որ քաղաքական կախվածություն չլինի: Մենք եթե հասնենք դրան, կկարողանանք արդյունավետություն ունենալ: Եվ եթե ընդդիմության ներկայացուցիչ լինի հանձնաժողովում, դա բավականին զգոն կպահի, եթե նման մտավախություն կա: Բայց այդ կառույցը չի ստեղծվում, որ ծածկելու կամ քողարկելու ֆունկցիա կատարի, այլ ընդհակառակը` բացահայտելու ֆունկցիա պետք է կատարի: Համենայն դեպս, այսպիսի կառույց մենք մինչ օրս չեն ունեցել: Կաշխատենք, կտեսնենք, ինձ թվում է՝ եթե արդյունավետությունից գոհ չլինենք, նորից կանդրադառնանք դրան:

– Ուժերի ներկայիս դասավորվածության դեպքում այդ մեկ ընդդիմադիրը կլինի «Ծառուկյան» դաշինքի՞ց:

– Չգիտեմ, դա քննարկման արդյունքում կլինի, մենք որևէ խնդիր չունենք:

– Ձեր կոալիցիոն գործընկերը` ՀՅԴ-ական Անդրանիկ Կարապետյանը, հայտարարեց, որ Կոռուպցիայի դեմ պայքարի շրջանակներում ազդարարման համակարգի ներդրումը «գործ տալ է», և կոչ արեց՝ «բոլորը բոլորի դեմ գործ տան»: Ի՞նչ եք կարծում` այդ դրույթն իսկապե՞ս գործ տալու դրույթ է:

– Դա ես ընդունում եմ՝ որպես անձնական կարծիք, և ոչ թե՝ Դաշնակցության դիրքորոշում: Կարծում եմ` այդ տերմիններից պետք է մի քիչ զգույշ լինեն, առավել ևս, երբ դա Ազգային ժողովի ամբիոնն է, և՛ ընդդիմության, և՛ իշխանության մեր գործընկերները պետք է ձեռնպահ մնան նման տիպի տերմինոլոգիայից: Հաճախակի ենք նման ժարգոնային բառապաշարի մենք ականատես լինում, որին ես շատ դեմ եմ:

Իսկ ինչ վերաբերում է նման որակումներ տալուն, ես չեմ կարծում, համենայն դեպս, հանձնաժողովի ստեղծման նպատակն այն է, որ նման արատավոր երևույթները, որոնք արդեն իսկ առերևույթ տեսել ենք, դրանց կանխարգելիչ մեթոդներ ձեռնարկելու համար պետք է հանրությանը և ընդհանրապես բոլորին կոչ անենք, որ այդ որակումներից չկաշկանդվեն, որովհետև դա անում են այս պետության և երկրի կայացման համար, և ես դրանում ոչ մի վատ բան չեմ տեսնում, երբ ցանկանում են կանխարգելիչ միջոցներ ձեռնարկել: Գերմանիայում, երբ մի ծխախոտ ես գցում ներքև, նրա քաղաքացին քեզ ստիպում է, որպեսզի դու վերցնես այդ աղբը, որ գցել ես գետնին:

Հակառակ դեպքում՝ չի հեռանում կողքիցդ, մինչև չվերցնես, կամ էլ զանգահարում է Ոստիկանություն: Կամ մեքենայի պատուհանից որևէ աղբ գցելու դեպքում ընդամենը 3 րոպե հետո քեզ Ոստիկանությունը կանգնացնում է, որովհետև հետևի մեքենան արդեն ահազանգել է: Մենք միշտ դրական ենք համարում դա, և այդ պատճառով է, որ իդեալական մաքուր քաղաքներ ունեն: Դա պարզապես մեկ օրինակ է: Մենք պետք է կարողանանք հոգեբանություն փոխել: Այդ «փոխել» բառը տարածված է, բայց պետք է կարողանանք նման առիթներ չտալ, որ ինչ-որ մեկին անհարմար վիճակի մեջ չդնենք, որովհետև անհարմար վիճակ է, որ պետք է հաղորդի այդ մասին: Պետք է կարողանանք այդ արատավոր երևույթներից ազատվել:

Ինձ թվում է, որ կգա ժամանակ, բայց նաև պետք է կանխարգելիչ մեթոդներ լինեն, բայց մեր հոգեբանությունը փոխելու համար պետք է ստիպողական քայլեր լինեն: Ինձ թվում է, որ այս օրենքը կնպաստի դրան, որ մենք արդեն զգոն լինենք, իմանանք, որ այդ արատավոր երևույթն ազդում է մեր զարգացմանը` բնության աղտոտման օրինակներից սկսած՝ մինչև կաշառակերություն, պաշտոնական դիրքի չարաշահում:

Դրան հասնելու համար միանգամից ոչինչ չի լինում, դրան հասնելու համար հոգեբանություն է պետք փոխել, և ինձ թվում է՝ դա բավականին լուրջ աշխատանք է, որի արդյունքները մենք աստիճանաբար կտեսնենք: Մոսկվան միանգամից չի կառուցվել:

Տեսանյութեր

Լրահոս