«Վատ աշխատող ընկերությունների մաքրման աշխատանքները մեզ համար շարունակական են լինելու». Արման Սահակյան
ՀՀ կառավարությանն առընթեր Պետական գույքի կառավարման վարչության պետ Արման Սահակյանն այսօր ԱԺ-ում ներկայացրեց Պետական գույքի մասնավորեցման 2017-2020 թվականների ծրագրի մասին նախագիծը և նշեց, որ առաջարկվող ծրագրով սահմանվում են մասնավորեցման ընթացիկ փուլի նպատակները, պետական գույքի ընտրության սկզբունքները, տնտեսության այն ոլորտները, որոնցում մասնավորեցումներ չեն նախատեսվում, և այլն։
«Պետական գույքի մասնավորեցման մասին օրենքի 4-րդ հոդվածի համաձայն՝ նախորդ ծրագրի ցանկում ընդգրկված, սակայն չմասնավորեցված ընկերություններն ու օբյեկտները նոր ծրագրի մասն են՝ վերջինիս ուժի մեջ մտնելու պահից»,- ասաց նա։
Նա նշեց, որ մասնավորեցվող նոր ընկերությունները ծրագրում ընդգրկելու համար հիմք են հանդիսացել մի շարք գերչատեսչությունների կողմից ներկայացված առաջարկություններն ու հիմնավորումները. «Ծրագրում ընդգրկվել են 11 հանրապետական և գործադիր մարմինների, մարզպետարանների ենթակայության տակ գտնվող թվով 24 ընկերություններ»։
«Ելք» դաշինքի պատգամավոր Գևորգ Գեորգիսյանը նշեց, որ մասնավորեցումից հետո «Հայֆիլմ» կինոստուդիայի վիճակն ավելի վատացավ. «Դա դեռ մի կողմ. 47 հիմնարկ ներկայացնել 1 փաթեթով անթույլատրելի է, որովհետև այս հիմնարկներից ամեն մեկն առանձին քննարկում է պահանջում։ Օրինակ՝ «Հայփոստը» շահույթով աշխատող հիմնարկություն է, ինչո՞ւ պետք է վաճառել, կամ Արաբկիր բժշկական կենտրոնը, և այլն»։
Արման Սահակյանն ասաց, որ ի սկզբանե նշել է՝ ընդամենը 24 նոր ընկերության մասին է խոսքը, ոչ թե 47, որովհետև 47-ից 23-ը, ըստ նրա՝ նախորդ մասնավորեցման ծրագրում գտնվող ընկերություններ են.
«Ձեր նշած հիմնական ընկերությունները նախորդ ծրագրերում ընդգրկված ընկերություններն են, այսինքն՝ ԱԺ-ն արդեն դրան հավանություն տվել է։ Մենք փորձում ենք 3 տարվա մեջ ավարտել մասնավորեցման գործընթացը։ Վատ աշխատող ընկերությունների մաքրման աշխատանքները մեզ համար շարունակական են լինելու։ Սա չի նշանակում, որ 2017-20թթ. ծրագիրը հաստատվեց, մենք այդտեղ փոփոխություններ չենք անելու, նոր ընկերություններ չենք մտցնելու, կամ որևէ ռազմավարական ընկերություն չենք հանելու այդ ցուցակից»։
