«Ավրորա»-ն աջակցելու է Գերմանիայի Բրանդենբուրգ երկրամասի մայրաքաղաք Պոտսդամի եկեղեցու վերականգնմանը
«Ավրորա» մարդասիրական նախաձեռնության հյուրերը ծանոթացան հայ մեծանուն երաժշտագետ, բանահավաք, խմբավար և մանկավարժ Կոմիտասի կենսագրությանը եւ թողած ժառանգությանը: Նախաձեռնության համահիմնադիրներ Ռուբեն Վարդանյանը, Նուբար Աֆեյանը, Ռոբերտ Բոշ հիմնադրամի ներկայացուցիչները եւ մի խումբ այլ հյուրեր այցելել են Կոմիտասի թանգարան ինստիտուտ՝ մասնակցելու «Կոմիտասի ժառանգությունը» խորագիրը կրող միջոցառմանը, որին բացման խոսքով ելույթ ունեցավ թանգարան ինստիտուտի տնօրեն Նիկոլայ Կոստանդյանը: Նա հյուրերին ներկայացրեց Կոմիտասի կենսագրությունը եւ նրա դերը հայկական մշակույթի ձեւավորման գործում: «Ուրախ եմ, որ «Ավրորա» նախաձեռնությանը միանում է նաեւ Կոմիտասի թանգարանինստիտուտը: Պատիվ է ողջունել հյուրերին, հատկապես մեր գերմանացի բարեկամներին, քանի որ Կոմիտասի տունը նաեւ մեր գերմանացի բարեկամների տունն է, ինչի մասին վկայում է Կոմիտասի կենսագրությունը»,- ասաց նա:
Նուբար Աֆեյանը ընդգծեց, որ կարեւոր է հասկանալ, որ աշխարհասփյուռ հայերը՝ Լիբանանում, Մոսկվայում, Ֆրանսիայում եւ այլուր չէին լինի, եթե բացարձակ օտար, այլազգի մարդիկ նրանց չփրկեին Հայոց ցեղասպանության տարիներին:
«Գերմանացիները, ֆրանսիացիները, նաեւ թուրքերից են եղել, որ փրկել են հայերի կյանքը. մի երեւույթ, որը երբեմն հայերի համար դժվար ըմբռնելի է, բայց այդպես է: Իմ դեպքում պապերս են փրկվել հենց գերմանացիների կողմից, եւ դրա մասին իմացել ենք Բուլղարիայում տպագրված հոդվածներից մեկից: Պապս ու նրա եղբայրը գործարարներ են եղել եւ դատապարտված են եղել ոչնչացման, ամբողջ տեղահանման ընթացքում Ստամբուլից սկսել են քշվել այն հոսքերով, ինչպես շատերի հետ է պատահել: Նրանք փաստացիորեն փրկվել են գերմանացի սպաների կողմից, ում հիմնական աշխատանքն է եղել այդ ժամանակ օգնել թուրքերին եւ կազմակերպել հայերի արտաքսումը: Տեսնելով, որ պապս ու եղբայրը գերմաներեն են խոսում, նրանց վերցրել են, բայց չէ որ կային այլ մարդիկ, ովքեր գերմաներեն չգիտեին: Սա երկու եղբայրների պատմություն է, ովքեր փոխել էին իրենց ինքնությունը: Ինչ վերաբերում է Կոմիտասին, նա առանձնահատուկ է, որովհետեւ հենց Կոմիտասն է կապված եղել գերմանական մշակույթին»,- ասաց Նուբար Աֆեյանը:
Նա հյուրերին ներկայացրեց նախաձեռնության առանձնահատկությունները՝ շեշտելով, որ այն կյանքի կոչելով ցանկանում են հայերին հնարավորություն տալ հայտնելու իրենց երախտագիտությունը:
Նախաձեռնության համահիմնադիրը հայտարարեց, որ «Ավրորա» նախաձեռնության շրջանակում նախատեսվում է նվիրատվություն կատարել Գերմանիայի Բրանդենբուրգ երկրամասի մայրաքաղաք Պոտսդամի եկեղեցու վերականգնմանը:
Միջոցառմանը ելույթ ունեցավ նաեւ Հայաստանում Գերմանիայի դեսպան Մաթիաս Քիսլերը, ով կարեւորեց նախաձեռնությունը նաեւ հայ գերմանական հարաբերություններն ընդգծելու առումով:
«Սա շատ զգացական միջոցառում է: Ինձ համար պատիվ է այսօր լինել այստեղ: Մեր հարաբերությունների պատմության մեջ եղել են շատ կարեւոր անձինք: Նրանցից մեկն Արմին Վեգներն էր, ով մեծ դեր խաղաց այդ տարիների ոճիրները ներկայացնելու գործում: Նա արել էր հարյուրավոր լուսանկարներ, որոնցից շատերը փրկվեցին, իսկ շատերը՝ դժբախտաբար ոչնչացվեցին: Մյուսը Յոհաննես Լեփսիուսն էր, ով առճակատման մեջ մտավ թուրքերի դեմ, երբ ականատես եղավ այդ դեպքերին, այնուհետեւ հարյուրավոր որբերի ապաստան տվեց: Այդ մարդկանց շարքերը կարող են համալրել նաեւ գերմանական բանակի սպաները, դիվանագետները»,- ասաց դեսպանը՝ ընդգծելով, որ ուրախ է, որ անցած տարի Բունդեսթագն ընդունեց եւ հստակ ի ցույց դրեց ցեղասպանության տարիներին նաեւ Գերմանիայի պատասխանատվությունը:
Նա տեղեկացրեց, որ վերջերս Գերմանիայի Բրանդենբուրգ երկրամասի գիտության, հետազոտության եւ մշակույթի նախարար Մարտինա Մյունխի՝ Հայաստան կատարած այցելության շրջանակում հնչել են բազմաթիվ առաջարկներ հաջորդ տարի Կոմիտասի 150-ամյակը հանդիսավոր կերպով նշել նաեւ Գերմանիայում, քանի որ դեսպանի խոսքով՝ թեպետ Կոմիտասն ու նրա գործունեությունը կապված են եղել Գերմանիայի հետ, այնտեղ Կոմիտասը դեռ բավականաչափ ճանաչված չէ:
Անդրադառնալով հայգերմանական հարաբերությունների ընդհանուր պատկերին՝ Մաթիաս Քիսլերը նշեց, որ չնայած Հայաստանի դժվարություններին եւ մարտահրավերներին՝ վերջին երկու տարիներին նա խրախուսելի փոփոխություններ է նկատել:
«ՏՏ ոլորտի զարգացում, ԹՈՒՄՈ կենտրոնը, որտեղ ռոբոտներ են պատրաստում, խրախուսում են հազարավոր դեռահասների, ինչպես նաեւ ոչ նվազ կարեւոր «Ավրորա» մարդասիրական նախաձեռնությունը. բոլոր այս նախագծերը միտված են դեպի ապագան: Եթե դրա հետ մեկտեղ բարելավվի նաեւ երկրի քաղաքական դաշտը, Հայաստանը լիովին կունենա հնարավորություն բարգավաճելու եւ զարգանալու ոչ պակաս, քան եվրոպական մեկ այլ երկիր»,- եզրափակեց նա:
Կոմիտասի ստեղծագործություններն ունկնդրելուց հետո հյուրերը շրջայց կատարեցին թանգարանինստիտուտում:
