Քադիրովը դեմ է դպրոցներում ավարտական երեկույթներ անցկացնելուն
Չեչնիայի ղեկավար Ռամզան Քադիրովն այն կարծիքին է, որ ավարտական երեկույթները չպետք է անցկացվեն դպրոցներում: Այդ մասին նա հայտարարել է հանրապետության կրթության եւ գիտության նախարար Իսմայիլ Բայխանովի հետ կայացած հանդիպմանը։
«Անցած տարիներին ծնողներն ինձ հաճախ էին դիմում ավարտական երեկոյի համար ամեն տեսակ դրամահավաքների մասին բողոքներով: Ավարտական երեկույթները միշտ եղել են ու կլինեն: Բայց միայն մեկ ուղղում՝ դրանք պետք է անցկացվեն դպրոցների պատերից դուրս»,-ասել է Քադիրովը:
Նրա խոսքով՝ այսուհետեւ այդ հարցը կամավորության հիմունքներով կլուծեն ծնողական կոմիտեներն ու շրջանավարտները:
«Ծնողներն իրենց հայեցողությամբ կարող են ավարտական երեկույթները կազմակերպել տարբեր սրճարաններում ու ռեստորաններում: Դպրոցական ուսումնառությունն ավարտելը նշել ցանկացողների համար նման վայրերի պակաս հանրապետությունում չկա»,-նշել է Քադիրովը:
«Այսպիսով, դպրոցներում բացառվում են դրամահավաքները: Եվս մեկ անգամ կրկնում եմ՝ ավարտական երեկույթներ անցկացվելու են, բայց միայն դպրոցների պատերից դուրս»,-ընդգծել է հանրապետության ղեկավարը:
