ԱՄՆ-ում շարունակվում է Ռուսաստանի հարցով հետաքննությունը
Մինչ ԱՄՆ-ի նախագահ Դոնալդ Թրամփը շարունակում է իր առաջին արտերկրյա այցը, իր հայրենի Միացյալ Նահանգներում շարունակվում է քննարկվել Ռուսաստանի վերաբերյալ հետաքննությունը:
Սպիտակ տունը փորձում է պատասխանել New York Times թերթի տեղեկատվությանը, թե նախագահ Դոնալդ Թրամփը Ռուսաստանի արտգործնախարար Սերգեյ Լավրովի հետ հանդիպման ընթացքում Հետաքննությունների դաշնային բյուրոյի նախկին ղեկավար Ջեյմս Քոմիին անվանել է «խելագար ու անպիտան»:
«Ես չեմ հիշում, թե նախագահը բառացի ինչ է ասել եւ չեմ կարծում նրանց հրապարակումը նրան ուղղակի է մեջբերում», – նախագահ Թրամփի ազգային անվտանգության հարցերով խորհրդական Հերբերտ ՄաքՄասթերը ներկա էր Սերգեյ Լավրովի հետ հանդիպմանը: – «Զրույցի ուղղվածությունը Ռուսաստանի հետ կապված բոլոր խնդիրները հետեւում թողնելն էր եւ համագործակցության ոլորտներ գտնելը»:
ԱՄՆ-ի Արդարադատության նախարարության կողմից հատուկ քննիչի նշանակմամբ Ռուսաստանի հետ կապերի հետաքննությունն ավելի մեծ ընթացք է ստանում:
«Մենք գաղափար անգամ չունենք, թե արդյոք նման կապեր գոյություն ունեցել են եւ թե արդյոք Քոմիին աշխատանքից հեռացնելու հանգամանքը դրա հետ կապ ունի, թե՝ ոչ», – նշում է դեմակրատ կոնգրեսական Բրադ Շերմանը:
Մամուլի համաձայն, Ջեյմս Քոմին իր զեկույցներում նշել է, որ Դոնալդ Թրամփը փորձել է իրվրա ճնշում գործադրել՝ խնդրելով կարճել նախագահի նախկին խորհրդական Մայքլ Ֆլինի դեմ բացված գործը:
«Ոչ ոք չի տեսել այդ զեկույցները: Ես չգիտեմ, թե դրանք որտեղ են եւ արդյոք գոյություն ունեն, սակայն մենք անշուշտ պահանջում ենք դրանք հրապարակել», – նշել է հանրապետական կոնգրեսական Ջեյսոն Չաֆեթսը:
Կասկածները հավանաբար կփարատի հենց ինքը՝ Ջեյմս Քոմին, ով օրերս կարող է ցուցմունք տալ Կոնգրեսում, արդեն՝ որպես անհատ քաղաքացի:
