Գագիկ Ծառուկյանը հավաքել է ԲՀԿ-ականներին
«Բարգավաճ Հայաստան» կուսակցության գրասենյակում մեկնարկել է կուսակցության առաջնորդ Գագիկ Ծառուկյանի և «Ծառուկյան» դաշինքի համամասնական և տարածքային ցուցակներով ընտրված պատգամավորների հանդիպումը: Հանդիպման ընթացքում որոշվելու է, թե դաշինքն ում թեկնածությունն է առաջադրելու Ազգային ժողովի փոխնախագահի պաշտոնում: Այս մասին լրագրողների հետ զրույցում հայտնեց ԲՀԿ անդամ, «Ծառուկյան» դաշինքի տարածքային ցուցակով պատգամավոր ընտրված Վարդան Բոստանջյանը:
«Որոշվելու է նաև, թե ով է ղեկավարելու խմբակցությունը և ով է լինելու խմբակցության քարտուղարը»,- նշեց Բոստանջյանը:
Անդրադառնալով իշխող քաղաքական ուժի հետ համագործակցության հեռանկարների վերաբերյալ հարցին` Վարդան Բոստանջյանն ընդգծեց, որ պետության համար կարևոր հարցերում «Ծառուկյան» դաշինքը կհամագործակցի թե իշխանության, թե ընդդիմության հետ:
