«Միսս ԱՊՀ 2017» միջազգային գեղեցկության մրցույթին Հայաստանը կներկայացնեն երկու գեղեցկուհի
«Միսս ԱՊՀ 2017» միջազգային գեղեցկության մրցույթի եզրափակիչ փուլին, որը կկայանա հունիսի 6-ին Երևանում, Հայաստանը կներկայացնեն երկու գեղեցկուհի` Արփինե Բալյանը և Մարինե Մարգարյանը:
Գեղեցկուհիներն արդեն իսկ մեծ փորձ ունեն, հասցրել են մասնակցել գեղեցկության մրցույթների ու ամենատարբեր ցուցադրությունների: Նրանք պատրաստվում են հավուր պատշաճի ներկայացնել սեփական երկիրը, որպեսզի հաղթական դափնին բաժին հասնի հենց Հայաստանին: «ՄԻՍՍ ԱՊՀ» միջազգային գեղեցկության մրցույթի եզրափակիչը կանցկացվի «Փարավոն» ժամանցի համալիրում: «Միսս ԱՊՀ 2017» մրցույթի եզրափակչին մասնակցելու համար Հայաստան կժամանեն ԱՊՀ անդամ երկրների 18-25 տարեկան 20-25 գեղեցկուհիներ, ովքեր հաղթել են իրենց երկրներում կայացած ընտրական մրցույթներում։
«Միսս ԱՊՀ 2017» միջազգային գեղեցկության մրցույթը նոր մասշտաբային ծրագիր է, որը
կազմակերպել են երկու բրենդային կազմակերպություններ՝ «Թոփ մոդել Ռոսսիի» և «Ռոսսիյսկայա կրասավիցա» համառուսական մրցույթների կազմակերպիչ «Ալեքս Գրուպ» ՍՊԸ պրոդյուսերական կենտրոնը (Մոսկվա)՝ ի դեմս գլխավոր տնօրեն Ալեքսանդր Աբդուլիմովի և «NAIRI TRAVEL» տուրիստական գործակալությունը (Երևան)՝ ի դեմս տնօրեն Նաիրի Մնացականյանի։
«Միսս ԱՊՀ 2017»ի եզրափակիչի ժյուրիի կազմում ընդգրկված են ոլորտի 11 փորձառու մասնագետներ: Նրանցից 3-ը Հայաստանից են, 4-ը՝ Ռուսաստանից և 4-ը՝ ԱՊՀ անդամ այլ երկրներից: Մասնակցում են 13 երկիր: Մրցանակային ֆոնդը կազմում է 16,2 մլն ՀՀ դրամ:
Միջոցառման աջակիցների թվում են ԱՊՀ միջպետական կոմիտեն, ՀՀ տնտեսական զարգացման և ներդրումների նախարարությունը, Երևանի քաղաքապետարանը:
