Ի՞նչ խնդիր կա Լևոն Մկրտչյանի և Կարեն Կարապետյանի միջև. պարզաբանում է Լևոն Մկրտչյանը
«Ես չեմ դժվարանում աշխատել վարչապետ Կարեն Կարապետյանի հետ»,- այսօր Հաղթանակ զբոսայգում այս մասին ասաց ՀՀ կրթության և գիտության նախարար Լևոն Մկրտչյանը։ Հարցին՝ ըստ տեղեկությունների՝ վարչապետը չի ցանկանում աշխատել Մկրտչյանի հետ, նա պատասխանեց, որ ինքը նման տեղեկություններ չունի։
Նա նշեց, որ վարչապետի հետ իր հարաբերությունները նորմալ են. «Մի քանի օր առաջ նա մեր նախարարությունում էր»։
Ինչ վերաբերում է իր ապագա պաշտոնավարմանը, նա ասաց, որ այդ մասին ոչինչ չգիտի։ Լրագրողները նորից հետաքրքրվեցին՝ դժվա՞ր է աշխատել Կարեն Կարապետյանի հետ։
«Ոչ, գիտե՞ք՝ խնդիրը հետևյալն է. նախարարությունն ու ոլորտը բավականին լուրջ փոփոխությունների կարիք ունեն, բայց այստեղ կարևոր է, որ մենք չանենք փոփոխություններ, որոնց համար հետո փոշմանենք։ Դրա միակ բանալին ամեն քայլի հրապարակայնացումն է։ Իսկ վարչապետի հետ որևէ խնդիր չունենք»։
