Մելանշոնն իր կողմնակիցներին դիմադրության կոչ է արել խորհրդարանական ընտրություններում
«Ըմբոստ Ֆրանսիա» ձախ շարժման առաջնորդ Ժան Լյուկ Մելանշոնը, որը չորրորդ տեղն էր զբաղեցրել նախագահական ընտրությունների առաջին փուլում, երկրորդ փուլից հետո մայիսի 7-ի երեկոյան հանդես է եկել հայտարարությամբ, որում ողջունել է Մարին լե Պենի պարտությունը՝ նշելով, որ «երկիրը համատարած մերժել է ծայրահեղ աջերին»:
Նրա խոսքով՝ քաղաքավարությունը եւ ժողովրդավարական ավանդույթը հարկադրում են ընդունելու Մակրոնի հաղթանակը եւ շնորհավորելու նրան:
«Նոր միապետնախագահի ծրագիրը հայտնի է: Դա պատերազմն է երկրի սոցիալական նվաճումների դեմ եւ բնապահպանական անպատասխանատվությունը»,-շարունակել է Ժան Լյուկ Մելանշոնը:
Ընդսմին նա կարծում է, որ դրությունն անելանելի չէ: «Խորհրդարանական ընտրությունները պետք է ցույց տան, որ բողոքի քվեարկությունից եւ ահի քվեարկությունից հետո եկել է դրական ընտրության, համատեղ ապագայի ընտրության պահը»,-ասել է նախագահի նախկին թեկնածուն:
Նա այն 7 միլիոն մարդկանց, ովքեր պաշտպանել են իր նախագահական ծրագիրը, կոչ է արել «մոբիլիզացվելու եւ միավորվելու, անկախ այն բանից՝ իրենք քվեարկել են պարոն Մակրոնի օգտին, թե՝ ոչ»:
Ֆրանսիայում խորհրդարանական ընտրությունները տեղի կունենան երկու փուլով՝ հունիսի 11-ին եւ 18-ին, հաղորդել է «Ինտերֆաքս»-ը:
