Оbamacare. Թրամփը հաղթանակ տարավ Ներկայացուցիչների պալատում
ԱՄՆ-ի Կոնգրեսի Ներկայացուցիչների պալատը ոչ մեծ գերակշռությամբ քվեարկել է առողջապահության բարենորոգության զգալի մասի չեղարկման օգտին, որն իրականացվել էր դեմոկրատ նախագահ Բարաք Օբամայի օրոք եւ հայտնի էր որպես Оbamacare:
Սպասվում է, որ դրան փոխարինելու կգա առողջապահության այն բարեփոխումը, որը մշակել է Հանրապետական կուսակցությունը, տեղեկացնում է BBC-ին: Մատչելի առողջապահության եւ հիվանդների պաշտպանության օրենքի շատ դրույթների չեղարկմանը հավանություն է տվել Ներկայացուցիչների պալատի 217 անդամ, դեմ են քվեարկել 213-ը: Այս քայլին հավանություն տված կոնգրեսականների թվում չի եղել ոչ մի դեմոկրատ:
Դիտորդները քվեարկության արդյունքները համարում են նախագահ Դոնալդ Թրամփի խոշոր հաղթանակը, որը տակավին նախընտրական արշավի ընթացքում խոստացել էր չեղարկել Оbamacare-ը:
Այժմ այս նույն հարցը պետք է քննարկի Սենատը, որտեղ հանրապետականները նույնպես մեծամասնություն են կազմում: Թրամփը լրագրողներին հայտարարել է, որ նոր օրինագծի պատրաստումը շատ ժամանակ չի պահանջի: «Կարող եմ ձեզ ասել, թե դրանից ինչ
կստացվի. էլ ավելի լավ օրենք»,-ասել է նա՝ հույս հայտնելով, որ նոր օրինագծին հավանություն կտան ոչ միայն հանրապետականները, այլեւ դեմոկրատները:
