Մեքսիկացի ուսանողը քաղցկեղը ճանաչող կրծկալ է ստեղծել
Մեքսիկացի ուսանող Խուլիան Ռիոս Կանտուն կրծկալ է ստեղծել, որն ունակ է ճանաչել կրծքի քաղցկեղը: Դրա համար նա արժանացել է Global Student Entrepreneur Awards (GSEA) մրցանակի, տեղեկացնում է Highsnobiety-ը:
Երիտասարդ գյուտարարի խոսքով, մոդելի ստեղծմանն իրեն ոգեշնչել է մայրը, որը երկար ժամանակ պայքարում էր հիվանդության դեմ եւ ենթարկվել է երկկողմ մաստեկտոմիայի (կաթնագեղձերի հեռացում):
Սարքն ստացել է EVA անվանումը, այն հանդերձված է 200 սենսորներով, որոնք որոշում են ջերմաստիճանը, ինչպես նաեւ գնահատում կրծքի ձեւի եւ քաշի փոփոխությունը: Բոլոր տվյալները փոխանցվում են սոցիալական ծրագրին, որը նախազգուշացնում է վտանգավոր ախտանշանների մասին:
