Սիրիայի հարցով Աստանայի բանակցություններն ավարտվել են, աշխատանքը կշարունակվի Ժնևում
Սիրիական ճգնաժամի խնդրին նվիրված աշխատանքն Աստանայում ավարտվել է, ընդդիմությունը տվյալ հարցերը կքննարկի Ժնևում փետրվարի 8-ին, RIA Novosti-ին հայտնել է Սիրիայի ընդդիմության պատվիրակության անդամ Հիշամ Մարուան։
«Այսօր ավարտվել են Աստանայի հանդիպումներն ու բանակցությունները, սակայն հանդիպումները կշարունակվեն Ժնևում և դրանք կամփոփեն, կհավելեն այն, ինչ այստեղ ձեռք է բերվել»,- հայտարարել է Մարուան։
Սիրիայի ընդդիմությունը հայտարարել է, որ դժգոհ է Աստանայի ամփոփիչ կոմյունիկեից, հայտնում է Reuters-ը։
Գործակալության տվյալով՝ Սիրիայի ընդդիմության դժգոհությունը հարուցել է կոմյունիկեի տեքստում Սիրիայում Իրանի ռազմական դերի մասին հիշատակության բացակայությունը։
Ժնևում բանակցությունների վերջին ռաունդը կայացել է 2016թ. ապրիլին։ Դրանց մասնակցում էր միայն Սիրիայի քաղաքական ընդդիմությունը։
Ենթադրվում է, որ Շվեյցարիայում խորհրդատվությունների հերթական ռաունդին մասնակցելու հրավեր կստանան նաև զինված ընդդիմության ներկայացուցիչները։
