«ԼՂ հակամարտության գոտում իրավիճակը մնում է պայթյունավտանգ». Ագրամունտ
ԵԽԽՎ-ի նախագահի պաշտոնում երեկ վերընտրված իսպանացի պատգամավոր Պեդրո Ագրամունտը, անդրադառնալով Եվրոպայի խորհրդի օրակարգում գտնվող առաջնահերթություններին, ափսոսանք է հայտնել, որ անցած տարի կառույցին չի հաջողվել տեսանելի ներդրում ունենալ Լեռնային Ղարաբաղի հակամարտության կարգավորման հարցում։
ԵԽԽՎ ձմեռային նստաշրջանի ընթացքում, որը մեկնարկել է երեկ Ստրասբուրգում, Ագրամունտը հիշեցրել է 2016թ. գարնանը ԼՂ հակամարտության էսկալացիայի մասին՝ հավելելով, թե «իրավիճակը մնում է պայթյունավտանգ»։
Նրա խոսքով՝ անհանգստացնում է փաստը, որ պահպանվում է Ուկրաինայի ճգնաժամի լարվածությունը, թեժանում է իրավիճակը Բալկաններում։
Ագրամունտը նշել է, որ հակամարտությունները չի կարելի լուծել ռազմական ճանապարհով, իսկ խորհրդարանը կարևոր գործիք է հակամարտությունների խաղաղ կարգավորման համար։
