Գիտնականը Թրամփի պատվին ցեցի նոր տեսակ է անվանել
Կանադացի գիտնական Վազրիկ Նազարին Կալիֆոռնիայում ցեցի նոր տեսակ է հայտնաբերել և այն անվանել Neopalpa donaldtrumpi՝ ի պատիվ ԱՄՆ ընտրված նախագահ Դոնալդ Թրամփի, հայտնում է korrespondent.net-ը։
Ինչպես բացատրել է Նազարին, միջատի գլուխը ծածկված է ոսկեգույն մազիկներով, ինչը իրեն հիշեցրել է Թրամփի սանրվածքը։
«Ցեցի այդ տեսակը կոչելով ԱՄՆ 45-րդ նախագահի պատվին՝ ես հուսով եմ գրավել հասարակության ուշադրությունը Հյուսիսային Ամերիկայի քիչ ուսումնասիրված միկրոֆաունայի նկատմամբ»,- նշել է Նազարին։
Մոտ 1 սմ թևերի բացվածք ունեցող միջատը բնակվում է Կալիֆոռնիայի հարավում և Մեքսիկայում։
Սա առաջին միջատն է, որն իր անվանումն ստանում է ԱՄՆ նորընտիր նախագահի պատվին։
Այսօրվա դրությամբ 9 կենդանատեսակ և միջատ է կրում ԱՄՆ գործող նախագահ Բարաք Օբամայի անունը, այդ թվում՝ ձուկ, մակաբույծ որդ։
