Բժիշկ Լիզայի աճյունը ճանաչվել է ԴՆԹ փորձաքննության արդյունքում
Դեկտեմբերի 25-ին Սև ծովում կործանված ինքնաթիռում գտնվող բժիշկ, «Արդար օգնություն» հիմնադրամի գործադիր տնօրեն, մարդասիրական ծրագրերով հայտնի Ելիզավետա Գլինկայի մարմինը, որն առավել հայտնի էր բժիշկ Գլինկա անունով, ճանաչվել է «Տու-154»-ի զոհերի թվում, RIA Novosti-ին հայտնել է հիմնադրամում աղբյուրը։
«Հուղարկավորությունը, նախնական տվյալներով, կկայանա երկուշաբթի օրը»,- պատմել է գործակալության զրուցակիցը։
ՌԴ մարդու իրավունքների խորհրդին կից կայքը հայտնում է, որ Ելիզավետա Գլինկայի հուղարկավորությունը տեղի կունենա հունվարի 16-ին Մոսկվայի Նովոդևիչի գերեզմանատանը։
Գլինկան որոշել էր անձամբ ուղեկցել մարդասիրական բեռը, որը նախատեսված էր Լաթաքիայի Տիշրին համալսարական հոսպիտալի համար:
Բժիշկ Գլինկան երկար տարիներ զբաղվել է անօթևաններին, փախստականներին, պատերազմներից, հակամարտություններից տուժածներին օգնություն ցուցաբերելով։
Նրա «Արդար օգնություն» հիմնադրամը հայտնի է նաև Լեռնային Ղարաբաղում ծավալած գործունեությամբ։ 1990-ականների սկզբին բժիշկ Լիզան օգնել է Մոսկվա տեղափոխել պատերազմի դաշտում ծանր վիրավորված զինծառայողներին, որոնք շտապ վիրահատության կարիք էին զգում։ Նրա գործունեության շնորհիվ հաջողվել փրկել շատերի կյանքը։
Պատերազմից հետո նա շարունակել է ակտիվորեն աջակցել Արցախին՝ ուղարկելով մարդասիրական օգնություն։ Ելիզավետա Գլինկան Արցախ է այցելել նաև 2009թ., որտեղ նպաստել է արցախցի փոքրիկների սրտի վիրահատությունների իրականացմանը։
Նա կազմակերպել էր մարդասիրական օգնության տրամադրում բժշկական գործիքների ու վիրակապային նյութերի տեսքով նաև 2016թ. ապրիլյան քառօրյա պատերազմից հետո։
