Կրեմլը Լեհաստանում ամերիկյան տանկերի տեղակայումը որակել է որպես Ռուսաստանին ուղղված սպառնալիք
Ռուսաստանը Լեհաստանում ամերիկյան տանկերի ու զրահատեխնիկայի տեղակայումը դիտարկում է որպես իր հետաքրքրություններին ու անվտանգությանն ուղղված սպառնալիք։ Այս մասին, ինչպես հայտնում է Interfax-ը, հայտարարել է ՌԴ նախագահի մամուլի քարտուղար Դմիտրի Պեսկովը։
«Մենք դրան նայում ենք՝ որպես մեզ համար սպառնալիք։ Դա գործողություն է, որը սպառնում է մեր հետաքրքրություններին, մեր անվտանգությանը։ Ավելին, խոսքն այն մասին է, որ երրորդ երկիրը ավելացնում է իր ռազմական ներկայությունը Եվրոպայի մեր սահմանների մոտ»,- ասել է Պեսկովը։
Նրա խոսքով՝ ԱՄՆ-ը «անգամ եվրոպական երկիր չէ»։
Պեսկովի խոսքով՝ «ցանկացած երկիր օտարերկրյա ռազմական ներկայության ավելացումն իր սահմանների մոտ կարող է ընկալել ու ընկալելու է բացասաբար»։
Հայտնի է, որ ամերիկացի զինվորականները Լեհաստան են տեղափոխել տանկեր՝ Ռուսաստանին զսպելու նպատակով։ Լեհական տարածքում կա ամերիկացի մոտ 1.3 հազար զինվորական։
