ԱՄՆ-ն ավելացրել է քրդերին ցուցաբերվող աջակցությունը. աղբյուր
ԱՄՆ-ն ակտիվացրել է զենքի մատակարարումները սիրիացի քրդերի «Դեմոկրատական միություն» կուսակցության (PYD) անդամներին, որոնց Անկարան համարում է ահաբեկչական կազմակերպություն, հայտնում է Anadolu գործակալությունը՝ վկայակոչելով աղբյուրներին։
Ավելի վաղ Թուրքիայի նախագահ Ռեջեփ Էրդողանը հայտարարել էր, որ ապացույցներ ունի, որ ԱՄՆ-ի գլխավորած միջազգային կոալիցիան աջակցություն է ցուցաբերում Սիրիայի ահաբեկչական խմբավորումներին, այդ թվում՝ ԴԱԻՇ-ին ու PYD-ին։
Անցած շաբաթ Անկարայում ԱՄՆ դեսպան Ջոն Բասսը հայտարարել էր, որ Վաշինգտոնը անմիջական աջակցություն չի ցուցաբերում «Դեմոկրատական միություն» կուսակցությանը, սակայն գործակալությունը նշում է, որ միայն վերջին 2 շաբաթում Սիրիայի Հասեքե նահանգում երեք անգամ մատակարարվել է ամերիկյան զենք, ինչպես երկնքից, այնպես էլ ցամաքային ճանապարհով։
Գործակալության աղբյուրների խոսքով՝ զենքի մատակարարման վերջին խոշոր խմբաքանակը Սիրիայի հյուսիսում տեղի է ունեցել երեքշաբթի երեկոյան։ Նշվում է, որ Իրաքի հյուսիսային Էրբիլ շրջանից դեպի Սիրիայի քրդամետ շրջաններ են ուղևորվել տասնյակ բեռնատարներ։
