ԼՂ հարցը քննարկվել է Բաքվում Ադրբեջան-Թուրքիա քաղաքական խորհրդատվությունների ընթացքում
Բաքվում կայացել է Ադրբեջան-Թուրքիա քաղաքական խորհրդատվությունների հերթական փուլը Ադրբեջանի և Թուրքիայի արտգործնախարարությունների միջև, հայտնում է APA գործակալությունը՝ վկայակոչելով Ադրբեջանի ԱԳՆ մամուլի ծառայությանը։
Խորհրդատվություններում Ադրբեջանը ներկայացրել է փոխարտգործնախարար Խլաֆ Խալաֆովը, Թուրքիան՝ փոխարտգործնախարար Ումիտ Յալչընը։
Հանդիպման ընթացքում կարևորվել է երկու երկրների միջև բոլոր ոլորտներում համագործակցության զարգացումը։
Քննարկվել ու դատապարտվել են ահաբեկչության բոլոր դրսևորումները։ Նշվել է, որ Ադրբեջանը միշտ աջակցել է Թուրքիային ու նրա կողքին է եղել։
Ընդգծվել է, որ Թուրքիա-Ադրբեջան-Իրան, Ադրբեջան-Թուրքիա-Վրաստան, Ադրբեջան-Թուրքիա-Թուրքմենստան համագործակցությունը կարևոր ավանդ ունի տարածաշրջանային համագործակցության զարգացման հարցում։
Քննարկվել է նաև Լեռնային Ղարաբաղի հակամարտության կարգավորումը, նշվել է, որ հակամարտությունը պետք է կարգավորվի միջազգային իրավունքի սկզբունքների համաձայն՝ Ադրբեջանի տարածքային ամբողջականության շրջանակում։
Հանդիպմանը քննարկվել են նաև Մերձավոր Արևելքի խնդիրները, միջազգային ահաբեկչության դեմ պայքարը, տարածաշրջանային հակամարտությունների լուծումը։
