Բեռլինի ողբերգությունը եղել է կանխամտածված հարձակում. ոստիկանություն
Հետաքննությունը ենթադրում է, որ Բեռլինի ողբերգությունը, երբ երկուշաբթի երեկոյան բեռնատարը մխրճվել էր սուրբծննդյան տոնավաճառում զբոսնող մարդկանց ամբոխի մեջ, եղել է կանխամտածված հարձակում, հայտնում է քաղաքի ոստիկանությունը։
«Մեր քննիչները կարծում են, որ բեռնատարը դիտավորյալ է ուղևորվել Բրայտշայդպլաց հրապարակի սուրբծննդյան տոնավաճառի ամբոխի կողմը»,- ասվում է Բեռլինի ոստիկանության Twitter-ում։
Ավելի վաղ ոստիկանները հաստատել էին, որ բեռնատարում մահացած հայտնաբերված ուղևորը Լեհաստանի քաղաքացի է եղել։
Բեռնափոխադրումներ իրականացնող լեհական ընկերության սեփականատերը հայտնել է, որ ընկերությունը վարորդի հետ կապը կորցրել էր ողբերգությունից մի քանի ժամ առաջ։
Հիշեցնենք, որ վերջին տվյալների համաձայն՝ դեպքի հետևանքով մահացել է 12 մարդ, շուրջ 50 մարդ հոսպիտալացվել է։
Երեկ ոստիկանությունը կալանավորել է բեռնատարի ենթադրյալ վարորդին։ Ինչպես հայտնում է գերմանական DPA գործակալությունը, վերջինս ներգաղթյալ է։
Tagesspiegel թերթի տեղեկություններով՝ տղամարդն ավելի վաղ հայտնվել էր իրավապահների ուշադրության կենտրոնում, կապված մանր իրավախախտումների հետ, սակայն ծայրահեղականության հետ կապերի մեջ չի կասկածվել։
