«Մենք՝ որպես իշխող քաղաքական ուժ, ուզում ենք, որ լինեն դաշինքներ, կառուցողական ընդդիմություն». Սուքիաս Ավետիսյան

«Ընտրություններին ընդառաջ, բնական է, որ քաղաքական դաշտն ակտիվանալու է, ինչն արտահայտվելու է և՛ տարբեր քաղաքական ուժերի ստեղծումով, և՛ տարբեր կոալիցիաների ստեղծումով, որին արդեն մենք ականատես ենք լինում: Իհարկե, հեռու չեն զավեշտալի իրավիճակները, որոնցում կարող ենք հայտնվել և, կարծես թե, հայտնվում ենք: Պետք է այս ամենին նորմալ նայել: Մենք Կուսակցությունների մասին նոր օրենքն ընդունեցինք ու փորձեցինք հնարավորինս ազատականացնել կուսակցությունների ստեղծումը։ Բոլորս էլ ընդունում ենք, որ Հայաստանի նման պետության համար շատ են կուսակցությունները, բայց ժողովուրդն ինքն է որոշում`որ քաղաքական ուժի հետևից գնալ»,- այսօր լրագրողների հետ հանդիպման ընթացքում նման տեսակետ հայտնեց ՀՀԿ-ական պատգամավոր Սուքիաս Ավետիսյանը:

Նրա խոսքով՝ չի կարելի քաղաքական դաշտը դարձնել զավեշտների առարկա. «Ցանկացած ժողովրդավարական պետություն իր քաղաքական դաշտով է, առաջին հերթին, ժողովրդավար, և մենք պետք է կարողանանք այդ ժողովրդավարությունը զարգացնել, ու դրան պետք է օգնեն բոլոր քաղաքական ուժերը: Հունվարի կեսերից էլ ավելի կակտիվանա քաղաքական դաշտը, կսկսվեն փոխադարձ մեղադրանքները, որոնք հիմա էլ են նկատվում»:

Անդրադառնալով երեք ընդդիմադիր կուսակցությունների՝ «Հանրապետություն», «Քաղաքացիական պայմանագիր» և «Լուսավոր Հայաստան», միացյալ դաշինքին, որի ստեղծման մասին հուշագիրը ստորագրվեց դեկտեմբերի 12-ին, նա ասաց, որ դա բնական գործընթաց է. «Բնական է, որ, եթե նրանք ուզում էին մնալ քաղաքական դաշտում, պետք է միավորվեին: Առաջիկայում էլի միավորումներ կլինեն: Մենք՝ որպես իշխող քաղաքական ուժ, ուզում ենք, որ լինեն դաշինքներ, կառուցողական ընդդիմություն, որպեսզի լինի նորմալ մրցակցային պայքար, որի արդյունքում ճիշտ զարգացումներ կլինեն»։