Պետդուման վավերացրեց Հայաստանի հետ ՀՕՊ-ի միավորված համակարգի մասին համաձայնագիրը
ՌԴ Պետդուման դեկտեմբերի 14-ին ընդունել է Ռուսաստանի և Հայաստանի միջև հավաքական անվտանգության կովկասյան տարածաշրջանում հակաօդային պաշտպանության տարածաշրջանային համակարգի ստեղծման համաձայնագրի վավերացման օրինագիծը: Փաստաթուղթը Ռուսաստանի խորհրդարանի ստորին պալատի քննարկմանն էր ներկայացրել ՌԴ նախագահ Վլադիմիր Պուտինը, տեղեկացնում է ՌԻԱ Նովոստին:
Հայաստանի հետ համաձայնագիրն ստորագրվել էր 2015 թվականի դեկտեմբերի 23-ին Մոսկվայում: Դրանով նախատեսվում է «հակաօդային պաշտպանության միավորված տարածաշրջանային համակարգի՝ որպես ԱՊՀ-ի մասնակից պետությունների հակաօդային պաշտպանության միացյալ համակարգի բաղկացուցիչ մասի ստեղծում»:
«Հայաստանը միշտ էլ մեր գործընկերն ու դաշնակիցն է եղել կովկասյան տարածաշրջանում: Համաձայնագրի վավերացումը համապատասխանում է ՌԴ-ի պետական շահերին»,- հայտարարել է Պետդումայի ԱՊՀ-ի գործերի, եվրասիական ինտեգրացման և հայրենակիցների հետ կապերի պրոֆիլային կոմիտեի ղեկավար Լեոնիդ Կալաշնիկովը:
