Մհեր Շահգելդյանն անընդունելի է համարում ԱԺ-ում պատգամավորի և լրագրողի միջև միջադեպը
Ազգային ժողովի ՕԵԿ խմբակցության քարտուղար Մհեր Շահգելդյանը անընդունելի է համարում խորհրդարանում պատգամավոր Ռուբիկ Հակոբյանի և լրագրող Վահե Մակարյանի միջև միջադեպը: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանը Մհեր Շահգելդյանն ընդգծեց, որ ինքն էլ երկար տարիներ աշխատել է ռադիոյում և լրագրողներից շատերի հետ երկար ճանապարհ է անցել: «Ես բացասական եմ վերաբերվում այս ամենին և կարծում եմ ու համոզված եմ, որ նման բան չի կրկնվի: Չպետք է նման միջադեպերը կրկնվեն»,- ասաց Շահգելդյանը:
Նա ընդգծեց, որ ինքն էլ շատ հաճախ է շփվում լրագրողների հետ, լինում են կարծիքների փոխանակումներ: Նրա խոսքով՝ կարծիքները կարող են երբեմն չհամընկնել, սակայն դա աշխատանքային գործընթաց է: Նա կարևորեց այն հանգամանքը, որ Ռուբիկ Հակոբյանը միջադեպի համար ներողություն է խնդրել:
