Միլիոնատեր պաշտոնյաների նկատմամբ վերաբերմունքն ավելի նորմալ է, քան մոնոպոլիստների

Շարունակում ենք ամփոել B4B.am-ի կողմից անցկացված «10 հարց՝ տնտեսության մասին» հարցման արդյունքները։

Հարցումն անցկացվել է նոյեմբերի 24-ից 30-ն ընկած ժամանակահատվածում՝ ինտերնետի միջոցով։ Հարցմանը մասնակցել է ավելի քան 1000 հոգի։

10 հարցերից այս անգամ կներկայացնենք ևս 2-ի արդյունքները, որոնք մենաշնորհներին և մեծահարուստ պաշտոնյաներին։

Հարցերից առաջինը հետևյալն էր՝ ինչպե՞ս եք վերաբերվում դոլարային միլիոնատեր պաշտոնյաների առկայությանը։ Հարցմանը պատասխանել են 1156 հոգի։

Որքան էլ ոմանց զարմանալի թվա, հարցվածների 64%-ը նորմալ է վերաբերվում պաշտոնյաների՝ միլիոնատեր լինելու հանգամանքին։ Այդ թվում՝ 4%-ը ընդհանրապես համարում է, որ հարուստ լինելու մեջ որևէ վատ բան չկա։ Իսկ 60%-ը նորմալ է վերաբերվում միլիոնատեր պաշտոնյաներին, եթե հարստության աղբյուրը հայտնի է։

6%-ը չեզոք դիրքորոշում ունի։ Իսկ բացասաբար վերաբերմունք ունեցողների կշիռը 30% է։ Այսինքն, մեր հասարակությունը բավականին ադեկվատ վերաբերմունք ունի մեծահարուստ պաշտոնյաների նկատմամբ և շատ փող ունեցողներին ի սկզբանե վատ չի վերաբերվում։

Մենաշնորհների (կարելի է նաև հասկանալ՝ մոնոպոլիստների) հարցում վերաբերմունքը միանգամայն այլ է։

«Ինչպե՞ս կվարվեիք, եթե մենաշնորհների դեմ պայքարելու հնարավորություն ունենայիք» հարցին ընդամենը 1%-ն է պատասխանել, որ ոչինչ չէր ձեռնարկի։

34%-ը նշել է, որ կսահմաներ խաղի նոր կանոններ՝ առանց նախկինի մեջ խորանալու։

Մնացած 65%-ը ավելի կոշտ մոտեցման կողմնակից են։ Մասնավորապես, 33%-ը կպետականացներ կամ կմասնատեր ոչ բնական մոնոպոլիաները։ Իսկ 32%-ը նշել է, որ քրեական պատասխանատվության կենթարկեր մոնոպոլիստներին։

Փաստորեն, ըստ այս հարցման արդյունքների, հասարակությունը միլիոնատեր պաշտոնյաների նկատմամբ ավելի հանդուրժողական վերաբերմունք ունի, քան մոնոպոլիստների։