«Ուզբեկստանի հավաքականի հետ հանդիպումը նոր ֆուտբոլիստների փորձարկելու լավ հնարավորություն է». Արթուր Պետրոսյան
Հայաստանի ֆուտբոլի ազգային թիմի գլխավոր մարզիչ Արթուր Պետրոսյանի կարծիքով, ուզբեկների հետ խաղում թիմի կազմում փորձարկումներ կլինեն: Փետրվարի 12-ին Թուրքիայի Անթալիա քաղաքում Հայաստանի ազգային հավաքականն ընկերական խաղում կմրցի Ուզբեկստանի հավաքականի հետ:
ՀՖՖ պաշտոնական կայքի հետ զրույցում Հայաստանի ազգային հավաքականի գլխավոր մարզիչ Արթուր Պետրոսյանը մեկնաբանել է նաև մրցակցի և հանդիպման անցկացման ժամկետների ընտրությունը:
«Քանի որ փետրվարին ՖԻՖԱ-ի կողմից նախատեսված չէ ընկերական հանդիպումների հատուկ օր, իսկ մենք անպայման ուզում էինք ընկերական հանդիպում անցկացնել, ընտրել ենք այնպիսի ժամանակահատված, երբ մեր գրեթե բոլոր ակումբները կգտնվեն մեկ վայրում, ինչը կհեշտացնի նրանց կողմից հավաքականին խաղացողների տրամադրումը:
Այդ նույն ժամանակահատվածում Թուրքիայում է գտնվելու նաև Ուզբեկստ անի հավաքականը, որը գրեթե նույն մակարդակի թիմ է, ինչ մեր ապագա մրցակից Ղազախստանի հավաքականը: Հետևաբար, հենց Ուզբեկստանի հավաքականի հետ ընկերական հանդիպում անցկացնելու մեր ընտրությունը պատահական չէ:
Ավելացնեմ նաև, որ խաղալու ենք հիմնականում Հայաստանի առաջնությունում հանդես եկող ֆուտբոլիստներով: Սա մեզ համար շատ լավ հնարավորություն կլինի ազգային հավաքականների մակարդակի հանդիպման ընթացքում գործի մեջ տեսնել այն ֆուտբոլիստներին, ովքեր մինչ օրս շատ խաղաժամանակ չեն ստացել հավաքականում»,- ասել է Պետրոսյանը:
