Արամ Ա կաթողիկոսն ու Գագիկ Ծառուկյանը սիրիահայության հարցով հանդիպում են ունեցել. Arevelk.am
arevelk.am-ը գրում է. Այսօր Լիբանանում հանդիպում են ունեցել Մեծի Տանն Կիլիկիո կաթողիկոս Արամ Ա-ն ու գործարար Գագիկ Ծառուկյանը: Ինչպես տեղեկանում ենք Անթիլիասից, Գագիկ Ծառուկյանը հատուկ Լիբանան է ժամանել և իր ծառայություններն առաջարկել սիրիահայության օժանդակության հարցում: Կաթողիկոսության պաշտոնական հաղորդագրությունից տեղեկանում ենք, որ Գագիկ Ծառուկյանը հայտնել է, թե Մայրավանք է այցելել՝ Մեծի Տանն Կիլիկիո կաթողիկոսի օրհնությունն ու ուղղությունը ստանալու և սիրիահայության հարցում գործելու համար:
Արամ Ա-ն շնորհակալություն է հայտնել գործարարին՝ եկեղեցաշինության և բազմաթիվ բարեգործությունների համար և նշել, որ այսօր հայության առաջնահերթ խնդիրներից մեկը մնում է սիրիահայությանն օժանդակելու հարցը: Հանդիպմանը մասնակցել են սփյուռքահայ քաղաքական գործիչներ, հոգևոր առաջնորդներ, համայնքի ներկայացուցիչներ:
Նշենք, որ մեկ տարի առաջ Գագիկ Ծառուկյանը կրկին այցելել էր Անթիլիաս և 500 հազար դոլար նվիրել սիրիահայությանը և Անթիլիասին:
