Թուրքիայում արգելել են մասնակցել քրդամետ Ժողովուրդների դեմոկրատական կուսակցության նիստին
Թուրքիայում մարդկանց արգելել են որպես հանդիսատես մասնակցել Թուրքիայում գործող Ժողովուրդների դեմոկրատական կուսակցության (HDP) խմբակցության ամենշաբաթյա նիստին: Այս մասին հայտնում է թուրքական demokrathaber.org լրատվական կայքը:
Կուսակցության մամուլի խոսնակ Այհան Բիլգեն դատապարտել է իր կուսակից ընկերների ձերբակալությունները, իշխանությունների կողմից արտակարգ դրության ռեժիմի շրջանակներում իրականացվող ճնշումները, հազարավոր մարդկանց գործազուրկ դարձնելը, տարբեր շրջաններում փողոց դուրս գալու արգելքները եւ զանգվածային ձերբակալությունները:
Թուրքիայի քրդամետ Ժողովուրդների դեմոկրատական կուսակցության համանախագահներ Սելահաթթին Դեմիրթաշը և Ֆիգեն Յուքսեքդաղը, ինչպես նաև կուսակցության անդամ ևս 9 պատգամավոր նոյեմբերի 4-ին ձերբակալվել էին, ինչը աշխարհում մեծ արձագանք էր գտել:
Թուրքիայում արտակարգ դրության ռեժիմը սահմանվել էր օգոստոսի 21-ից մինչև հոկտեմբերի 19-ը: Հոկտեմբերի 3-ի կառավարության նիստում որոշում է ընդունվել հոկտեմբերի 19-ից սկսած այն երկարաձգել ևս 90 օրով:
