Մեկնարկեց ՌեԱնիմանիա միջազգային 8-րդ փառատոնը
ՌեԱնիմանիա Երևանի միջազգային անիմացիոն ֆիլմերի և պատկերապատման 8-րդ փառատոնի մեկնարկը տրվեց «Մոսկվա» կինոթատրոնում`«Կարմիր կրիան» ֆիլմի ցուցադրությամբ:
«Մեկ տարի առաջ սկսեցինք մեր ասոցացիայի գործունեությունը: Ընդգրկված է 40 երկիր, այդ թվում նաև Հայաստանը: Յուրաքանչյուրն իր դեսպանն ունի: Որոշեցինք Հայաստանի դեսպան կարգել ՌեԱնիմանիա փառատոնի հիմնադիրտնօրեն Վրեժ Քասունուն»,- նշեց «Եվրոպական անիմացիոն ֆիլմերի մրցանակաբաշխություն» ասոցացիայի գլխավոր քարտուղար Ժան Փոլ Քոմին:
ՀՀ մշակույթի փոխնախարար Արթուր Պողոսյանի խոսքով՝ մշակույթի նախարարությունը միշտ էլ աջակցել է ՌեԱնիմանիա նախագծի իրականացմանը և փառատոնն իր մշակների շնորհիվ ընդլայնել է աշխարհագրությունը, ինչը շատ ողջունելի է:
Բացմանը յուրահատուկ ստեղծագործություններով հանդես եկան Միքայել Ոսկանյանի Miq’s art folk quartet խմբի անդամները:
Ներկա էին կինոաշխարհի տարբեր մասնագետներ՝ դերասաններ, ռեժիսորներ, մուլտիպլիկատորներ:
«Ամեն տարի փառատոնի ընթացքում մուլտիպլիկատոր Ռոբերտ Սահակյանցի անվան մրցանակ է հանձնվում անիմացիայի, մուլտիպլիկացիայի արվեստում ունեցած ներդրման համար: ՌեԱնիմանիայի խորհրդի որոշմամբ ես եմ հանձնում մրցանակը:
Մասնակիցների քանակը տարիների ընթացքում ավելանում է, և դա ոգեշնչող է»,- ընդգծեց ռեժիսոր, մուլտիպլիկատոր Դավիթ Սահակյանցը:
Փառատոնի ընթացքում ֆոտոշարքի միջոցով հիշեցին նաև ՌեԱնիմանիայի թիմի անդամ Սևան Նաղաշին, ով հեռացել է կյանքից:
ՌեԱնիմանիա Երևանի միջազգային անիմացիոն ֆիլմերի և պատկերապատման 8րդ փառատոնի ընթացքում կցուցադրվեն բազմաթիվ անիմացիոն ֆիլմեր, աշխարհի տարբեր երկրներից Հայաստան ժամանած հյուրերը կներկայացնեն նաև պրեմիերաներ և հանդես կգան վարպետության դասերով: Փառատոնի փակման հանդիսությունը կլինի նոյեմբերի 3-ին:
