Միջազգային կազմակերպությունները պահանջել են Ադրբեջանին հեռացնել EITI-ի անդամ երկրների ցուցակից
Միջազգային կազմակերպությունները պահանջել են Ադրբեջանին հեռացնել Հանքարդյունաբերության ոլորտում թափանցիկություն նախաձեռնության (EITI) անդամ երկրների ցուցակից: Այս մասին հայտնում է ադրբեջանական azadliq.info լրատվական կայքը:
Այս պահանջը EITI-ի խորհրդին ուղղված նամակում ներկայացվել է 18 միջազգային ազդեցիկ կազմակերպությունների կողմից, որոնց թվում են նաեւ Freedom House-ը եւ Index on Censorship-ը:
Նմանատիպ պահանջի պատճառը Ադրբեջանում քաղաքացիական հասարակության նկատմամբ իրականացվող շարունակական բռնաճնշումներն են:
Այս նույն պատճառով EITI-ում Ադրբեջանի կարգավիճակը 2015 թվականի ապրիլ ամսին լիիրավ անդամի մակարդակից իջեցվել էր թեկնածուի մակարդակի, եւ Ադրբեջանին պահանջ էր ներկայացվել վերջ տալու բռնաճնշումներին:
Միջազգային կազմակերպությունների ուղղած նամակում ասվում է. «Ադրբեջանի ավտորիտար վարչակարգը շարունակում է անողոք կերպով բռնաճնշումներ կիրառել ակտիվիստների նկատմամբ, շարունակվում են նաեւ ձերբակալությունները: Ադրբեջանի կառավարությունը սառեցնում է ակտիվիստնրի բանկային հաշիվները, արգելափակում ակտիվիստներին դրսից ուղարկված ֆինանսները:
Կազմակերպության անդամությունը պահելու համար Ադրբեջանի կառավարությունը պետք է քաղաքական կամք դրսեւորի եւ վերջ դնի հասարակական կազմակերպությունների եւ քաղաքացիական հասարակության նկատմամբ իրականացվող ճնշումներին»:
