Սաակաշվիլիի կինը պարտվել է Վրաստանի խորհրդարանական ընտրություններում
Շաբաթ օրը՝ հոկտեմբերի 22-ին, Վրաստանի Զուգդիդի շրջանի 3 ընտրական տեղամասերում կայացած կրկնակի խորհրդարանական ընտրությունների արդյունքներով՝ հաղթել է «Վրացական երազանք» կուսակցության թեկնածու Էդիշեր Տոլորայան, հայտնում է Interfax-ը՝ վկայակոչելով իշխող կուսակցության նախընտրական շտաբին:
Հաղորդվում է, որ Տոլորայան ստացել է 981 ձայն, իսկ երկրի նախկին նախագահ Միխայիլ Սաակաշվիլիի կինը՝ «Միացյալ ազգային շարժում» կուսակցության թեկնածու Սանդրա Ռուլովսը, հավաքել է 441 ձայն:
Միևնույն ժամանակ, Մառնեուլի շրջանի Կըզըլ-օջլու գյուղի 48-րդ ընտրատեղամասում հաղթել է «Միացյալ ազգային շարժում» կուսակցությունը, որի մեծամասնական թեկնածու Ակմամեդ Իմամկուլիևը ստացել է ընտրողների 378 ձայները: «Վրացական երազանքի» թեկնածու Թեյմուրազ Նավերիանին ստացել էր 307 ձայն:
Մեծամասնական համակարգով խորհրդարանական ընտրությունների երկրորդ փուլը տեղի կունենա հոկտեմբերի 30-ին:
