«Հարգելով ձեր պրոֆեսիոնալիզմը՝ խնդրում եմ՝ մի ջրեք հարցը». Ռուբիկ Հակոբյանը՝ Վաչե Տերտերյանին
Հեռուստատեսության և ռադիոյի արտադրանքի արխիվացման հնարավորությունների վերաբերյալ ԱԺ պատգամավորներ Միքայել Մելքումյանն ու Ռուբիկ Հակոբյանը գրավոր հարց էին ձևակերպել, որի վերաբերյալ այսօր ԱԺ-ում ցանկանում էին լսել Տարածքային կառավարման և զարգացման նախարարի տեղակալ Վաչե Տերտերյանի կարծիքը։
«Ես, իհարկե, հիշում եմ այդ առաջարկը, ես խոսել եմ մեր արխիվի ղեկավար պարոն Վիրաբյանի հետ, և առաջիկա հարմար պահին ձեզ հետ կհանդիպենք։ Դրանք այս պահին գործող իրավական դաշտում տարբեր տիրույթներում են գտնվում։ Խնդիրը կարևոր է, դրա մասին չէ խոսքը։ Մեր կարծիքով՝ դա փոքր փոփոխությամբ և այս օրենքի նախագծի շրջանակներում լուծում ունենալ չի կարող»,- նշեց Վ. Տերտերյանը
Պատգամավոր Ռուբիկ Հակոբյանը դիմեց Տերտերյանին. «Գործընկերոջս կողմից տրված հարցին, դուք, որ հրաշալիորեն տիրապետում եք այս ամբիոնին, գրեթե չպատասխանեցիք։ Եկել եմ՝ ասեմ՝ ինչո՞ւ չեք պատասխանում։ Հեռուստաարխիվը մոնոպոլիա է դարձել օրվա իշխանության համար։ Լևոն Տեր-Պետրոսյանի օրոք Հայաստանի թիվ մեկ ամեն ինչը Լևոն Տեր-Պետրոսյանն էր. ինքն էր հաղթել Ղարաբաղյան պատերազմը, ինքն էր կարողացել միջպետական հարաբերություններում բարձր նշաձող ապահովել, և այլն։ Ռոբերտ Քոչարյանի ժամանակ նույնն էր. Լևոն Տեր-Պետրոսյանն անտեսվեց։ Սերժ Սարգսյանի ժամանակ էլ է նույնը կատարվում։ Այդպիսի արխիվ մեզ պետք չէ, և որովհետև մոնոպոլիան հեռուստատեսության մոտ է, պետք է բերել իրավական նորմալ դաշտ»։
Ռուբիկ Հակոբյանը նաև ընդգծեց. «Մի ասեք, որ տարբեր տիրույթներում են գտնվում. ոչ, տարբեր տիրույթներում չեն։ Պետք է քաղաքական որոշում լինի, ու հեռուստաարխիվը տեղափոխվի արխիվ։ Գիտեք՝ պետություններ կան, որ առանց Սահմանադրության են ապրում, որովհետև ավանդույթներ են ձևավորել։ Այն պետությունն է պետություն, որն ունի ավանդույթ, չեն մերժում միմյանց։ Մենք չենք ձևավորել ավանդույթ, որովհետև արխիվներն էլ պահում ենք՝ ըստ քաղաքական ճաշակի և ըստ օրվա իշխանության։
Ես կատեգորիկ եմ այս հարցում և գտնում եմ, որ արխիվը պետք է տեղափոխվի Պետական ազգային արխիվի դաշտ։ Հարգելով ձեր պրոֆեսիոնալիզմը՝ խնդրում եմ՝ մի ջրեք հարցը։ Դա պետական, ազգային անվտանգության հարց է»։
