ՄԱԿ-ի գլխավոր ասամբլեան հոկտեմբերի 13-ին կդիտարկի Գուտերեշին գլխավոր քարտուղարի պաշտոնում նշանակելու հարցը
ՄԱԿ-ի գլխավոր ասամբլեան հոկտեմբերի 13-ին կդիտարկի Պորտուգալիայի նախկին վարչապետ Անտոնիու Գուտերեշին 5 տարի ժամկետով ԱՄԿ-ի գլխավոր քարտուղարի պաշտոնում նշանակելու հարցը: Այդ մասին հաղորդել է Գլխավոր ասամբլեայի 71-րդ նստաշրջանի նախագահ Պիտեր Թոմսոնի պաշտոնական կայքը:
Կայքում տեղադրված նամակում, որն ուղարկվել է ՄԱԿ-ի անդամ 193 երկրներին, նշվում է, որ հոկտեմբերի 13-ին նիստը նախատեսված է Նյու Յորքի ժամանակով 10:00-ին: Նամակին կցվել է բանաձևի նախագիծը, որը կընդունվի հանդիպման ժամանակ:
Համաձայն փաստաթղթի, Անտոնիու Գուտերեշը կնշանակվի ՄԱԿ-ի գլխավոր քարտուղարի պաշտոնում 2017 թվականի հունվարի 1-ից մինչ 2021-ի դեկտեմբերի 31-ը:
ՄԱԿ-ի գործող գլխավոր քարտուղար Պան Գի Մունի լիազորությունները լրանում են ընթացիկ տարվա դեկտեմբերի 31-ին:
Անտոնիու Գուտերեշը 1995-2002 թթ. զբաղեցրել է Պորտուգալիայի վարչապետի, իսկ 2005 թվականի հունիսից մինչև 2015 թվականի դեկտեմբեր` ՄԱԿ-ի փախստականների հարցերով Գերագույն հանձնակատարի պաշտոնները:
Միաժամանակ Գուտերեշը 2013 թվականից Գալուստ Գյուլբենկյան հիմնադրամի հոգաբարձուների խորհրդի անդամ է: Խորհրդի կազմում նա ընդգրկված է մինչև 2018 թվականը:
