Հոլանդիայի խորհրդարանի պատգամավորը Հաագայում կդասախոսի Հայաստանի զարգացումների թեմայով
Հաագայում գործող «Աբովյան մշակութային կենտրոն»ում Հայաստանի զարգացումների շուրջ դասախոսությամբ հանդես կգա Հոլանդիայի խորհրդարանի սոցիալիստական կուսակցության (SP) խմբակցության պատգամավոր Հարի վան Բոմելը։ Միջոցառումը կկազմակերպվի Հայաստանի Հանրապետության 25-ամյակի տոնակատարությունների շրջանակում։
Այս մասին տեղեկացրին «Աբովյան մշակութային կենտրոն»ից՝ հավելելով. «Հարի Վան Բոմելը, Հոլանդիայի խորհրդարանում որպես Սոցիալիստական կուսակցության (SP) արտաքին գործերի խոսնակ, քաջատեղյակ է հայ իրականությանը` նույնպես իր Հայաստան և Արցախ այցելությունների շնորհիվ, և արդեն երկար տարիներ է, ինչ ներգրավված է Նիդերլանդների հայ համայնքի հարցերում: Նա որոշել է չվերադառնալ Հոլանդիայի խորհրդարան որպես պատգամավոր հաջորդ ընտրություններից հետո։ Այնուհետև նա իր ուշադրությունը բևեռելու է զարգացող ժողովրդավարությունների վրա, ելնելով միջազգային հարաբերությունների հարցերում իր երկարամյա փորձից, և հետևաբար կարող է դրական դեր խաղալ Հայաստանում ժողովրդավարության զարգացման գործում: Պարոն Հարի Վան Բոմելի ներածական խոսքից հետո, հնարավորություն կլինի Հայաստանի զարգացումների շուրջ կարծիքներ փոխանակել պարոն Վան Բոմելի հետ»։
