Սննդամթերք Լոռու մարզի բոլոր մանկապարտեզներին՝ ԱԺ պատգամավոր Կարեն Կարապետյանի կողմից

Լոռու մարզի Սպիտակի և Գուգարքի տարածաշրջաններով ավարտին հասցվեց  «Սնունդ մանկապարտեզներին»  ծրագիրը, որն իրականացվում է ՀՀ ԱԺ պատգամավոր Կարեն Կարապետյանի նախաձեռնությամբ և ֆինանսավորմամբ: Մինչ այս սննդամթերք էին ստացել Տաշիրի, Ստեփանավանի, Թումանյանի տարածաշրջանների և Վանաձորի բոլոր նախադպրոցական հաստատությունները: Այսպիսով, մարզի բոլոր ութսունմեկ մանկապարտեզներում հնարավոր դարձավ բավական ժամանակ ապահովել երեխաների սննդի բազմազանությունն ու առատությունը:

Այս ծրագիրը տարիներ շարունակ իրականացվել է մարզի մի քանի տասնյակ համայնքերի մանկապարտեզներում, իսկ այս տարի ընդլայնել է աշխարհագրությունն՝ ընդգրկելով ողջ մարզը:

Նախադպրոցական հաստատությունների ղեկավարների հավաստմամբ, սա բավական լուրջ օգնություն է մանկապարտեզներին,  քանի որ մի կողմից առավել հագեցած է դարձնում երեխաների սննդակարգը, մյուս կողմից, խնայված միջոցներով ՆՈՒՀ-երը հնարավորություն են ստանում  սննդակարգում ներառել հավելյալ այլ սննդամթերք, այդ թվում՝ միրգ և բանջարեղեն, ինչպես նաև իրականացնել անհրաժեշտ այլ ծախսեր՝ դարձյալ ի շահ երեխաների:

Ինչպես վկայում են ՆՈՒՀ-երի ղեկավարներն ու երեխաների ծնողները, ԱԺ պատգամավոր Կարեն Կարապետյանի և ընդհանրապես Կարապետյանների ընտանիքի ու «Տաշիր» բարեգործական հիմնադրամի աջակցությունը իրենց համար նորություն չէ, հատկապես կրթության ոլորտի նկատմամբ նրանց ընդգծված ուշադրությունը՝ սկսյալ մանկապարտեզից մինչև ԲՈՒՀ,  հայտնի է բոլորին:

Ինչ վերաբերում է այս ծրագրին, ապա նախաձեռնության հիմքում ընկած է համոզմունքը, որ ազգի առողջությունն ու վաղվա օրը առաջին հերթին կախված են այսօրվա մատաղ սերնդի ճիշտ և լիարժեք սննդի ապահովմամբ: Իսկ հատկապես մարզերում հաճախ համայնքային բյուջեները բավարար չեն լինում, ուստի համայնքային ենթակայության ՆՈՒՀ-երում երբեմն դժվարություններ են առաջանում: Ուստի Կարեն Կարապետյանի ցանկությունն  է՝ ամեն ինչ անել, որ մեր փոքրիկները փոքր-ինչ անգամ չզգան այդ դժվարությունները:

«Տաշիր» բարեգործական հիմնադրամի մամուլի ծառայություն