«Ինձ քաղաքական հարցեր մի տվեք, մշակույթից հարցրեք՝ պատասխանեմ». Հասմիկ Պողոսյանը՝ իր հնարավոր պաշտոնանկության մասին
Պարզվում է՝ երկրի համար կարևորագույն պետական պաշտոններից մեկը՝ Մշակույթի նախարարի պորտֆելը, տարիներ շարունակ զբաղեցրած Հասմիկ Պողոսյանը հանկարծ որոշել է այլևս չպատասխանել քաղաքական բնույթի հարցերի: Կարելի է ենթադրել, որ երեկ Կառավարության նիստի ընթացքում նորանշանակ վարչապետ Կարեն Կարապետյանի նկատողությունը տիկին նախարարին՝ լինել հնարավորինս լակոնիկ, տեղ է հասել:
168.am-ի հարցին՝ ի՞նչ է Հ. Պողոսյանը մտածում առաջիկա հնարավոր պաշտոնանկության մասին, քաղաքական երկարամյա պատմություն ունեցող, իսկ ավելի կոնկրետ՝ ամենաերկարակյաց Մշակույթի նախարարի համբավը վայելող այս տիկինը, ո´չ ավել, ո´չ պակաս, պատասխանում է. «Ինձ քաղաքական հարցեր մի տվեք, մշակույթից հարցրեք՝ պատասխանեմ»:
Մեզ մնում է հուսալ և սպասել, որ նոր կառավարության կազմում, այնուամենայնիվ, դրական փոփոխությունների անհրաժեշտությունն ակնհայտ իրականություն է ոչ միայն նորանշանակ վարչապետի, այլև Մշակույթի նախարարության և հատկապես՝ քաղաքական բնույթի հարցերից վաղուց արդեն հոգնած Մշակույթի նախարարի համար:
Ի դեպ, նշենք, որ Հ. Պողոսյանը նեղ շրջանակներում հնարավոր պաշտոնանկության մասին հարցին ի պատասխան՝ ասել է, թե ինքն անհանգստանալու-մտածելու բան չունի:
