Մամեդյարովը Հառլեմ Դեզիրի հետ քննարկել է ԼՂ հակամարտությունը
Ադրբեջանի արտգործնախարար Էլմար Մամեդյարովը հանդիպել է Ֆրանսիայի Եվրոպական հարցերով պետքարտուղար Հառլեմ Դեզիրի հետ, տեղեկացնում է ադրբեջանական APA գործակալությունը:
Ինչպես հայտնել են Ադրբեջանի ԱԳՆ մամուլի ծառայությունից, հանդիպմանը կարծիքներ են փոխանակվել Լեռնային Ղարաբաղի հակամարտության կարգավորման առարկայական բանակցությունների գործընթացի ներկայիս վիճակի վերաբերյալ:
Կողմերը կարևորել են առարկայական բանակցությունների գործընթացի արագացումը:
Մամեդյարովը հայտարարել է, թե «Ադրբեջանը միշտ կողմնակից է հակամարտության շուտափույթ կարգավորման նպատակով առարկայական և արդյունավետ բանակցություններին»:
Հանդիպմանը կողմերը գոհունակություն են հայտնել նաև Ադրբեջանի և Ֆրանսիայի միջև երկկողմ կապերի կայուն զարգացման առնչությամբ:
