Եվգենի Սատանովսկին՝ իսլամական պետությունների ներկայացուցիչների «ղարաբաղյան» նիստի մասին
Ադրբեջանի ԱԳՆ մամուլի ծառայության ղեկավար Հիքմեթ Հաջիևը «ԱզերԹաջ» գործակալությանը տված հարցազրույցում հայտարարել է, որ ԼՂ հարցով Իսլամական համագործակցություն» կազմակերպության (ԻՀԿ) կոնտակտային խմբի առաջին նիստը ծրագրված է անցկացնել սեպտեմբերին՝ ՄԱԿ գլխավոր ասամբլեայի 71-րդ նստաշրջանի շրջանակներում: Նիստն անցկացվելու է արտգործնախարարների մակարդակով:
ԻՀԿ-ի կոնտակտային խումբը, ըստ ՌԴ Մերձավոր Արևելքի անկախ գիտական կենտրոնի տնօրեն, վերլուծաբան Եվգենի Սատանովսկու, ստեղծվել է ընդամենը մեկ նպատակով՝ Հայաստանին վնասելու:
«Իսլամական աշխարհի երկրների կոնտակտային խումբը որոշել է ներխուժել նաև ղարաբաղյան խնդիրների մեջ: Նպատակը մեկն է՝ վատություն անել:
Նման կառույցների նպատակը բացառապես քաղաքական սպեկուլյացիաներն է, և ոչ մի դրական բան դրանցից սպասել չի կարելի»,- ասել է Սատանովսկին Rusarminfo-ի հետ զրույցում:
Փորձագետի կարծիքով՝ ԻՀԿ-ի կոնտակտային խմբի նիստը ոչ մի նշանակություն չի կարող ունենալ, քանի որ նրանց ընդունած որոշումները չունեն գործնական կիրառություն, ինչի մասին վկայում է Իսրայելի օրինակը, որով երկար ժամանակ ԻՀԿ-ն նույնպես զբաղվել է:
ԼՂ հարցով ԻՀԿ-ի կոնտակտային խումբը ստեղծվել է 2016թ. ապրիլին Ստամբուլում տեղի ունեցած ԻՀԿ երկրների 13-րդ գագաթաժողովի արդյունքներով: Դրա կազմի մեջ մտել են 7 երկրներ՝ Թուրքիան, Մարոկկոն, Սաուդյան Արաբիան, Պակիստանը, Մալայզիան, Գամբիան ու Ջիբութին:
