Սերգեյ Շոյգուն Բաքվում կքննարկի ԼՂ հակամարտությունը
Ադրբեջանի նախագահ Իլհամ Ալիևը երեկ ընդունել է ՌԴ պաշտպանության նախարար Սերգեյ Շոյգուին, հայտնում է RIA Novosti գործակալությունը` վկայակոչելով Ալիևի պաշտոնական կայքին:
Հիշեցնենք, որ երեկ Շոյգուն կարճատև աշխատանքային այցով մեկնել էր Ադրբեջան:
«Ադրբեջանի ղեկավարը կիրակի ընդունել է ՌԴ պաշտպանության նախարար Սերգեյ Շոյգուին»,- ասվում է հաղորդագրության մեջ:
Հայտնի է, որ Շոյգուն Բաքվում բանակցություններ պետք է վարի նաև Ադրբեջանի պաշտպանության նախարար Զաքիր Հասանովի հետ: Շոյգուն Ադրբեջան է մեկնել ՌԴ պաշտպանության նախարարության պատվիրակության հետ:
Ինչպես լրագրողներին հայտնել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկովը, կողմերը քննարկելու են երկկողմ ռազմական և ռազմա-տեխնիկական համագործակցության հարցեր, միջազգային և տարածաշրջանային անվտանգության հարցեր, կարծիքներ են փոխանակելու ԼՂ հակամարտության վերաբերյալ:
Հիշեցնենք, որ օգտոստոսի 13-ին անսպասելի այցով Մոսկվա էր մեկնել նաև Ադրբեջանի պաշտպանության նախարար Զաքիր Հասանովը:
