Գյուլենը խոստանում է վերադառնալ Թուրքիա, եթե ապացուցվի հեղաշրջման փորձին իր առնչությունը
Ամերիկաբնակ իսլամիստ քարոզիչ Ֆեթուլլահ Գյուլենը, որին թուրքական իշխանությունները համարում են վերջերս Թուրքիայում տեղի ունեցած ձախողված հեղաշրջման կազմակերպիչ, հայտարարել է, որ եթե այդ մեղադրանքների մի մասը ապացուցվի, ինքնակամ կվերադառնա Թուրքիա:
«Եթե անգամ իմ դեմ մեղադրանքների մեկ տասներրորդ մասը ապացուցվի, ես երդվում եմ վերադառնալ Թուրքիա և կրել ամենախիստ պատիժը»,- գրել է Գյուլենը ֆրանսիական Monde պարբերականի համար գրված սյունակում:
Թուրքիայի իշխանությունները պահանջում են ԱՄՆ-ից արտահանձնել Գյուլենին, որին մեղավոր են համարում հեղաշրջման փորձի համար, ԱՄՆ-ն իր հերթին Թուրքիայից ապացույցներ է պահանջում, որ նա առնչություն ունի հեղաշրջմանը:
Ընդդիմադիր քարոզչի փաստաբանները հայտարարել են, որ մտավախություն ունեն իրենց հաճախորդի կյանքի համար:
Այն բանից հետո, երբ Ստամբուլի դատարանը կայացրեց Գյուլենին կալանավորելու որոշում, նա հայտարարեց, որ Թուրքիայում անկախ դատական համակարգ չկա:
«Քաջ հայտնի է, որ թուրքական դատական համակարգը չունի իրավական անկախություն, այնպես որ, այդ հրամանը նախագահ Էրդողանի` դեպի բռնապետություն շարժման և ժողովրդավարության սկզբունքներից հեռանալու ևս մեկ օրինակ է»,- ասվում է Գյուլենի հայտարարության մեջ:
