Սաակաշվիլին մտադիր է «երկու ճակատով» պայքարել ուկրաինացի և վրացի օլիգարխների դեմ
Վրաստանի նախկին նախագահ, Օդեսայի մարզի նահանգապետ Միխայիլ Սաակաշվիլին հայտարարել է, որ իր համար Վրաստանն ու Ուկրաինան անբաժանելի են և ինքը պայքարելու է օլիգարխների դեմ «երկու ճակատով»: Այս մասին նա հայտարարել է NewsOne հեռուստաալիքի եթերում:
Նրա խոսքով` ինքը հուսով է, որ Վրաստանի ներկայիս ղեկավարը կհեռանա իշխանությունից, քանի որ նրա ժամանակ երկրում բարեփոխումներն արգելակվել են:
«Ես ակտիվորեն ներգրավված եմ Վրաստանի խորհրդարանական ընտրությունների գործընթացում: Վրաստանի համար սկզբունքորեն կարևոր է, որ ռուս օլիգարխը, որը իր տակ ճզմում է իմ ողջ երկիրը, ինչ-որ կերպ բաց թողնի իր չանչերը: Վրաստանում ներկայումս չկա կոռուպցիա հիմնական պետական ինստիտուտներում: Հարկերը ցածր են, բիզնեսը հեշտ է կառավարելը: Այդ ամենը տեղի է ունենում իներցիայով, սակայն զարգացման տեմպը արագ նվազել է: Այն մեծ նախագծերը, որոնք մենք սկսել ենք, դադարեցված են: Եվ մարդիկ դա զգում են»,- նշել է Սաակաշվիլին:
Նա խոստացել է պայքարել թե´ Վրաստանի, թե´ Ուկրաինայի օլիգարխների դեմ:
«Բնականաբար, ես այնտեղ ակտիվորեն կմասնակցեմ: Ինձ համար Վրաստանն ու Ուկրաինան անբաժանելի են: Ուկրաինայում ես նույնպես պայքարում եմ օլիգարխների համակարգի դեմ, կոռուպցիայի, մաֆիոզային կառույցների դեմ»,- ընդգծել է նա:
