«Հանուն խոսքի ազատության». խմբագիրները 2 ամիս ժամանակ են տվել իրավապահ մարմիններին

Օգոստոսի 10-ին Երևանի Ազատության հրապարակում նախատեսված հավաքը՝ հանուն խոսքի ազատության, կայացավ։ Հայաստանի լրատվական դաշտի ներկայացուցիչները համատեղ հայտարարություն ընդունեցին, որի տակ ստորագրեցին մեդիադաշտի գրեթե բոլոր ներկայացուցիչները՝ որոշ բացառություններով, ինչը նշանակում է, որ մենք միասնական ենք, վճռական՝ տեր կանգնելու մեր մասնագիտական իրավունքներին: Հասարակական-քաղաքական շրջանակները, ՀՀ Մարդու իրավունքների պաշտպանը ևս իրենց աջակցությունն ու համերաշխությունը հայտնեցին լրագրողներին:

Անգամ ՀՀ ոստիկանության «02» շաբաթաթերթը դրեց իր ստորագրությունը հայտարարության տակ, որը մենք՝ նախաձեռնող խմբի անդամներս, չենք ընդունում, քանի որ ՀՀ ոստիկանությունը հայտարարության տակ ստորագրելու փոխարեն՝ կոնկրետ անելիք ունի։ Այդ կառույցը պետք է բացահայտի լրագրողների, այդ թվում և՝ «02»-ի ներկայացուցիչների նկատմամբ բռնություն գործադրածներին և քննչական կառույցների միջոցով պատասխանատվության ենթարկի:

Այսպիսով, մենք սպասում ենք 2 ամիս՝ մեծ ուշադրությամբ հետևելով իրադարձությունների զարգացմանը, թե ով, երբ, իր որ արարքի համար կալանավորվեց, որից հետո կրկին կհավաքվենք՝ արդյունքներն ամփոփելու և հետագա անելիքները որոշելու համար:

Ստորև ներկայացվում է օգոստոսի 10-ին Ազատության հրապարակում ստորագրված հայտարարության տեքստը:

Հայտարարություն

Թեև գործող իշխանությունն առիթը բաց չի թողնում հայտարարելու, որ կարևորում է մամուլի, խոսքի ազատության դերը, սակայն փաստացի արվում է ամեն ինչ՝ լրագրողների աշխատանքը խոչընդոտելու, դժվարացնելու և տարաբնույթ ճնշումներ բանեցնելու համար: Պետական մակարդակով տարիներ շարունակ հետևողականորեն լրագրության դաշտը վարկաբեկվում է, փորձ է արվում չորրորդ իշխանության նկատմամբ անվստահություն սերմանել հասարակության շրջանում՝ ինչպիսին առկա է մեր երկրում օրենսդիր, գործադիր ու դատական իշխանության նկատմամբ:

Բազմաթիվ առիթներ են եղել՝ արձանագրելու, որ լրագրողների նկատմամբ իշխանության տարբեր ճյուղերում առկա է ակնհայտ ագրեսիվ վերաբերմունք, որը ժամանակ առ ժամանակ դրսևորվում է զանգվածային ակցիաների ընթացքում՝ բռնություններով:

Նախորդ տարի հունիսի 23-ին «Էլեկտրիկ Երևան» բողոքի ակցիաների ժամանակ լրագրողները թիրախավորված ծեծի ենթարկվեցին, ու մինչ օրս որևէ մեկը պատասխանատվության չի ենթարկվել: Իսկ այս տարվա հուլիսյան իրադարձություններից հետո, թեև ՀՀ Հատուկ քննչական ծառայության կողմից հայտարարվեց, որ 4 ոստիկանի նկատմամբ մեղադրանք է առաջադրվել, այնուամենայնիվ չկա որևէ երաշխիք, որ բոլոր մեղավորներն իրենց գործողություններին համարժեք պատժի են արժանանալու: Այսպես այլևս շարունակվել չի կարող:

Մենք կարծում ենք, որ օգոստոսի 1-ին ՀՀ նախագահ Սերժ Սարգսյանի խոսքում հնչած ներողությունը և կատարվածը մոռանալու հորդորները՝ ուղղված հուլիսի 29-ին իրենց մասնագիտական պարտականությունը կատարող լրագրողներին, բավարար չեն՝ Հայաստանում անվտանգ ու ազատ լրատվական գործունեություն ծավալելու համար: Անհրաժեշտ են գործնական և տեսանելի քայլեր:

– Բոլոր այն մարդիկ՝ անկախ իրենց կարգավիճակից, ովքեր համարձակվել են հուլիսի 29-ին նպատակաուղղված ձեռք բարձրացնել լրագրողների վրա, մասնագիտական գործիքներ կոտրել, բռնություն գործադրել, պետք է առավելագույնը 2 ամսվա ընթացքում ՀՀ քրեական օրենսգրքի 164 հոդվածով նախատեսված (Լրագրողի մասնագիտական օրինական գործունեությանը խոչընդոտելը) հատկանիշներով քրեական պատասխանատվության ենթարկվեն: Լրագրողական հանրությունը սպասում է կոնկրետ քայլերի, պետք է կալանավորումներ լինեն։

– Լրագրողների նկատմամբ պետական մակարդակով իրականացվող բացասական քարոզչությունը պետք է դադարեցվի. մենք գործում ենք ՀՀ Սահմանադրությամբ նախատեսված՝ քաղաքացու տեղեկացված լինելու իրավունքն ապահովելու համար և հույս ունենք, որ հասարակությունն անտարբեր չի մնա իրավիճակի նկատմամբ:

– Լրագրողական դաշտում կա վճռականություն՝ համախմբված պայքարելու մեր մասնագիտական իրավունքների պաշտպանության համար: Եվ մենք պատրաստ ենք օգտագործելու լրագրողական բոլոր, ընդհուպ՝ մինչև ծայրահեղ միջոցները՝ այդ նպատակին հասնելու համար, եթե այս հայտարարությունը չունենա կոնկրետ հետևանքներ:

(10.08.2016)

Նախաձեռնող խմբի անդամներ՝

«Ազգ» օրաթերթի գլխավոր խմբագիր Հակոբ Ավետիքյան
«Առավոտ» օրաթերթի գլխավոր խմբագիր Արամ Աբրահամյան
«168 Ժամ» թերթի գլխավոր խմբագիր Սաթիկ Սեյրանյան ևam առցանց կայքի խմբագիր Գառնիկ Գևորգյան
«Ժամանակ» օրաթերթի և 1in.am կայքի գլխավոր խմբագիր Արման Բաբաջանյան
«Ժողովուրդ» օրաթերթի և ArmLur.am առցանց կայքի գլխավոր խմբագիր Թագուհի Թովմասյան
«Իրատես» թերթի և irates.am առցանց կայքի գլխավոր խմբագիր Փիրուզա Մելիքսեթյան
«Հայկական Ժամանակ» օրաթերթի և armtimes.com առցանց կայքի գլխավոր խմբագիր Լուսինե Բարսեղյան
«Հրապարակ» օրաթերթի և Hraparak.am առցանց կայքի գլխավոր խմբագիր Արմինե Օհանյան
«Մեդիամաքս» մեդիա ընկերության գլխավոր խմբագիր Դավիթ Ալավերդյան
«Չորրորդ իշխանություն» թերթի և chi.am առցանց կայքի գլխավոր խմբագիր Շողեր Մաթևոսյան
yerkir.am կայքի գլխավոր խմբագիր Ագնեսա Խամոյան
A1plus.am կայքի տնօրեն Մեսրոպ Մովսեսյան
«Հետք»-ի գլխավոր խմբագիր Էդիկ Բաղդասարյան
«Երկիրմեդիա» հեռուստաընկերության լրատվական ծրագրի տնօրեն Գեղամ Մանուկյան