Ամերիկացի վերլուծաբաններն Իրանում նավթարդյունահանման աճ են ակնկալում
Իրանում նավթի արդյունահանումը մինչև 2016թ. վերջը կավելանա օրական հավելյալ 300 հազար բարելով, կարծում են ամերիկյան JP Morgan բանկի վերլուծաբանները, որոնք հրապարակել են նավթի շուկայի հարցով ամենամյա զեկույցը: Այս մասին հայտնում է Trend-ը:
«Պատժամիջոցների չեղարկումից հետո Իրանը մինչ օրս նավթարդյունահանման ծավալներն ավելացրել է օրական 800 հազար բարելով»,- ասվում է զեկույցում:
Վերլուծաբանների կանխատեսումներով` նավթի արդյունահանումը երկրում 2016թ. երրորդ եռամսյակում կկազմի օրական 3,7 միլիոն բարել նավթ, իսկ չորրորդ եռամսյակում`օրական 3,8 մլն բարել:
2017թ. վերլուծաբանները Իրանում կանխատեսում են նավթի արդյունահանում օրական 3,8 մլն բարել մակարդակում բոլոր 4 եռամսյակներում` 2016թ. օրական 3,5 մլն բարելի դիմաց:
ՕՊԵԿ-ի վերջին զեկույցի համաձայն` Իրանում նավթի արդյունահանումը հունիսին կազմել է 3,644 մլն բարել, ինչը 77,8 հազար բարելով ավելի է մայիսի համեմատ:
Իրանի կառավարությունն ավելի վաղ հայտարարել էր, որ Իրանը պլանավորում է մինչև օգոստոսի վերջ հասնել օրական 4 մլն բարել նավթարդյունահանման մակարդակին:
