«Զինյալ տղերքն ունեն հզոր դաշնակից՝ դա ալանն է, թալանն է, կոռուպցիան, անարդարությունները… որոնք երկիրը անկման վիճակի են հասցրել». Լևոն Ջավախյան

Արձակագիր Լևոն Ջավախյանի կարծիքով՝ ՀՀ Ոստիկանության ՊՊԾ գունդը գրավելու քայլին դիմած զինյալները պետք է հավատան ինչ-որ բանի, բայց չեն հավատում:
Այսօր լրագրողների հետ հանդիպման ընթացքում նա նշեց, որ, թեև առայժմ մեծ պայթյուն տեղի չի ունեցել, բայց Հոկտեմբերի 27-ից հետո սա էլ պակաս պայթյուն չէր.
«Նրանք գնդի տարածքը գրավեցին, որովհետև ուզում էին՝ հետո այլոք գային, զինվեին, որ սկսվի «Սոդոմ-Գոմորը», մի բան, որի հետ այդքան էլ համամիտ չեմ: Զինյալ տղերքն ունեն մի հզոր դաշնակից: Այդ դաշնակիցը, ցավոք սրտի, ոչ մտավորականներն են, ոչ էլ ցուցարարներն են, դա ալանն է, թալանն է, կոռուպցիան, անարդարությունները… որոնք երկիրն անկման վիճակի են հասցրել»:

Արձակագիրը նշեց, որ նախագահական ընտրություններում «մոլորյալ» է եղել ու իր ձայնը տվել է Սերժ Սարգսյանին. «Բայց այդ մարդը երկիրը հասցրեց այս վիճակին: Ես զգում եմ՝ իշխանությունն ինչ քաղաքականություն է որդեգրել՝ արյունաքամ է անում այդ զինյալներին: Մարդ առ մարդ, գնդակ առ գնդակ հարցերը լուծում են ու տանում իրենց ուզած վախճանին: Էս մեկն էլ կուլ կտան, էս մեկն էլ կգնա, քանի որ ժողովուրդն այնպես չի կանգնում, ինչպես որ պետք է: Այդ մարդիկ ճարահատյալ այդ քայլին են գնացել՝ ստեղծելով կատարյալ դեմոկրատիա: Ո՞րն է կատարյալ դեմոկրատիան. երբ իշխանության ձեռքին զենք կա, դիմացն էլ զենք կա: Մարդիկ ճիգ են թափում՝ գոնե ավտոմատով իրենց իրավունքները իրացնելու»:

Նա նշեց, որ «Սասնա ծռեր» զինված խմբի տղաները պետք է հանձնվեն. «Եթե զենքերը վայր չդնեն, իշխանությունները ձևը գտել են՝ վայր դնել են տալիս: Արյունաքամ են լինում այդ տղաները: Ափսոս են իրենք»:

168.am-ի դիտարկմանը՝ խմբի տղաներն ասել են, որ ոչ մի դեպքում չեն հանձնվելու, նա այսպես արձագանքեց. «Շատ բան են ասում, բայց ամեն ասած չի, որ արվում է: Պավլիկն էլ էր իր տղայի հետ ասում, տեսա՞ք՝ ինչ ստացվեց»:

Մանրամասները՝ 168.am-ի տեսանյութում: