Ադրբեջանում 25 հազար դիմորդների ավելի քան 80 տոկոսն «անբավարար» է ստացել
Ադրբեջանում բարձրագույն ուսումնական հաստատություններ դիմած 24.921 դիմորդներից միայն 6 հոգին են կարողացել քննություններում բարձր` 700 միավոր հավաքել, իսկ 80 տոկոսից ավելին «անբավարար» գնահատական է ստացել:
«Ազադլըգ» թերթն այդ առնչությամբ գրում է, որ եթե նախորդ քննաշրջաններում պատկան մարմինները հայտնում էին քննություններից 0100 միավոր հավաքած դիմորդների թիվը, ապա այս տարի խուսափել են դա անել, որպեսզի մեկ անգամ եւս չբացահայտվի Ադրբեջանում կրթության աղետալի վիճակը:
Թերթը գրում է, որ խայտառակ արդյունքներ է գրանցվել նաեւ ավելի վաղ ուսուցիչների վերաորակավորման քննությունների անցկացման ժամանակ:
«Հայտնի ճշմարտություն է Ադրբեջանում կրթության ոլորտը կոռուպցիայի մեջ թաղված լինելը, միջնակարգ դպրոցի գործունեության կորուստը, եւ այն, որ երկրում զանգվածային անգրագիտություն է տիրում: Իսկ ադրբեջանական կառավարությունը ցանկանում է խուսափել 24.921 դիմորդներից միայն 6ի 700 միավոր հավաքելու խայտառակ արդյունքից:
Վիճակն այնքան վատ է, որ 6 հոգու բարձր արդյունքը որպես սենսացիա է ներկայացվում: 6 հոգու 700 միավոր հավաքելու համար ուրախանալու փոխարեն, պետք է ամոթ զգանք հազարավոր դիմորդների «2» գնահատական ստանալու համար», գրում է թերթը:
Թերթը գրում է, որ Ադրբեջանի իշխանությունները զբաղված են թերի կամ չեղած հաջողություններն աննախադեպ զարգացում ներկայացնելով, ժողովրդին խաբելու միջոցով ժամանակ շահելով, ինչի պատճառով իրավիճակը երկրում բոլոր բնագավառներում գնալով ավելի վատանում է:
