Լիտվան աջակցություն է հայտնել ԼՂ հակամարտության բացառապես խաղաղ կարգավորմանը

ՀՀ դեսպան Տիգրան Մկրտչյանը հուլիսի 15­ին հանդիպել է Լիտվայի ԱԳ նախարար Լինաս
Լինկյավիչյուսի հետ։ Այս մասին  տեղեկացրին ՀՀ արտաքին գործերի նախարարության մամուլի, տեղեկատվության և  հասարակայնության հետ կապի վարչությունից:
Հանդիպման ընթացքում դեսպան Մկրտչյանը ընդգծել է Լիտվայի հետ երկկողմ ձևաչափով համագործակցության բարձր մակարդակը՝հավելելով, որ իր առաքելության օրակարգի հիմնական նպատակներից է այն էլ ավելի խորացնելուն և զարգացնելուն, Լիտվայում Հայաստանի տեսանելիությունը էլ ավելի բարձրացնելուն ուղղված գործունեությունը:

ՀՀ դեսպանը կարևորել է Լիտվայի հետ բազմակողմ ձևաչափով փոխգործակցությունն Եվրամիության, ՆԱՏՕ­ի, ԵԱՀԿ­ի և այլ միջազգային կառույցների շրջանակներում:

Նախարար Լինկյավիչյուսը բարձր է գնահատել երկկողմ հարաբերությունների զարգացման դինամիկան, մասնավորապես տնտեսական ոլորտում՝ այդ համատեքստում կարևորելով միջկառավարական տնտեսական հանձնաժողովի աշխատանքներ և երկկողմ տնտեսական
ներդրումները:

Դեսպան Տիգրան Մկրտչյանը նախարար Լինաս Լինկյավիչյուսին է ներկայացրել ՀՀ­ԵՄ միջև բանակցությունների ընթացքը՝ նշելով, որ այդ բանակցությունները կառուցվում են առկա փորձի և դրանք խորացնելու երկկողմ պատրաստակամության հիման վրա:

Հանդիպման ընթացքում զրուցակիցներն անդրադարձել են նաև ղարաբաղյան հիմնախնդրի կարգավորմանը, բանակցությունների վերսկսման համար համապատասխան պայմանների ստեղծման ուղղությամբ ձեռնարկվելիք քայլերին։ Նախարար Լինկյավիչյուսը նշել է, որ Լիտվան աջակցում է ղարաբաղյան հակամարտության բացառապես խաղաղ կարգավորմանը։