Նիսում արգելվել է լողալ ծովափերում
Ֆրանսիայի Նիս քաղաքի իշխանությունները հուլիսի 14ին իրականացված ահաբեկչությունից հետո որոշում են կայացրել անորոշ ժամանակով փակել քաղաքի Անգլիական ծովափը: Բացի այդ, արգելք է դրվել Նիսի գրեթե բոլոր ծովափերի երկայնքով լողալու վրա: Այս մասին տեղեկացնում է ՏԱՍՍը:
Ահաբեկչության հետևանքով չեղյալ են համարվել Նիսում առաջիկա օրերին ծրագրված միջոցառումները: Դրանց շարքում են` փոփաստղ Ռիհաննայի համերգը, որը պետք է տեղի ունենար 35 հազար մարդու տարողունակությամբ մարզադաշտում, ինչպես նաև հուլիսի 1620ը նախատեսված ջազային փառատոնը:
Արգելված է նաև փողոցային շուկաների անցկացումը: Ֆրանսիայի միջերկրածովյան Նիս քաղաքում հուլիսի 14ի երեկոյան, երբ ֆրանսիացիները նշում էին Ազգային տոնը՝ Բաստիլի օրը, իրականացված ահաբեկչության հետևանքով զոհերի թիվը հասել է 84ի: Եվս 18 մարդ ծայրահեղ ծանր վիճակում է:
Բեռնատարը մխրճվել է ազգային տոնի առիթով քաղաքի կենտրոնական հատվածներից մեկում հավաքված ամբոխի մեջ, ապա կրակ բացել մարդկանց ուղղությամբ: Հաղորդվում է, որ վարորդը սպանվել է ոստիկանների կողմից:
