«Իրոք, մեծ աղետ է տեղի ունեցել». Հովիկ Աբրահամյանը՝ կարկուտի մասին
ՀՀ կառավարությունն այսօրվա նիստի ընթացքում որոշում կայացրեց գումար տրամադրել Արագածոտնի, Արմավիրի, Լոռու մարզպետարաններին: Որոշման նախագիծը ներկայացնող տարածքային կառավարման և զարգացման նախարար Դավիթ Լոքյանն ասաց, որ կառավարության որոշման նախագիծը պայմանավորված է վերջին տասնօրյակում ՀՀ տարածքում, հատկապես Արմավիրի, Արագածոնի,Լոռու, Գեղարքունիքի, Կոտայքի մարզերում տեղի ունեցող բնական աղետների հետ:
Ըստ որոշման նախագծի՝ ՀՀ Արագածոտնի, Արմավիրի և Լոռու մարզերի մի շարք համայնքներում հունիս և հուլիս ամիսներին հորդառատ անձրևների և կարկտահարության հետևանքով տուժել են բնակիչներ, բնակելի տներ և օժանդակ շինություններ, ինչպես նաև՝ վնասվել են մի շարք գյուղամիջյան ճանապարհներ, կամուրջներ, հենապատեր:
Ըստ նախագծի՝ Արագածոտնի մարզպետարանին 2016թ. կհատկացվի 27,4 մլն դրամ դրամ, Արմավիրի մարզպետարանին՝ 61,6 մլնդրամ, Լոռու մարզպետարանին՝ 16մլն դրամ: Դավիթ Լոքյանն ասաց, որ կիրակի օրվա հեղեղի արդյունքում Արմավիրի մարզում 20-ից ավելի համայնքներ ամբողջությամբ կորցրել են ռեսուրսները, և համայնքների բնակիչների պահանջով կառավարության կողմից հատկացվել է 22 հակակարկտային համակարգ:
Վարչապետ Հովիկ Աբրահամյանն ասաց, որ հարցը քննարկել են Հանրապեության նախագահի հետ, որոշում կայացրել առաջարկները քննարկել, փորձել հնարավորինս օգնել ժողովրդին:
«Պարզ է, որ մենք մեր քաղաքացիների բոլոր ցանկությունները չենք կարող բավարարել: Երեկ եղել ենք մի քանի համայնքներում, և իրոք, մեծ աղետ է տեղի ունեցել. մարդիկ ունեն վարկեր, ծախսեր են իրականացրել՝ ակնկալելով բերք ստանալ, իրացնել, հետո վարկերը մարել: Եվ նաև առաջարկ կար, որպեսզի վարկերը հետաձգվեն: Ես պարոն Ջավադյանին խնդրում եմ, նաև առաջարկում եմ (մի քանի օր առաջ խոսել ենք), որպեսզի առևտրային բանկերի հետ համագործակցենք և հնարավորինս, գոնե մեկ տարով հետաձգենք գյուղացիների վարկերը»,- ասաց Հովիկ Աբրահամյանը:
