Լավրովը Երևանում հրաժարվեց անդրադառնալ ԼՂ հակամարտությանը՝ հորդորելով ծանոթանալ ՀԱՊԿ տարածված հայտարարությանը
Երևանում գտնվող ՌԴ ԱԳ նախարար Սերգեյ Լավրովը հրաժարվեց հայ լրագրողների հետ զրույցից: Այսօր Երևանում անցկացված ՀԱՊԿ անդամ-պետությունների արտաքին գործերի նախարարների նիստից հեռանալիս, ՌԴ ԱԳ նախարարը միայն մի քանի բառով արձագանքեց լրագրողների ԼՂ հակամարտությանն առնչվող հարցերին. «Հայտարարություն է ընդունվել, որը կտարածվի և կծանոթանաք»:
Հիշեցնենք, որ այսօր Երևանում անցկացվեց ՀԱՊԿ արտաքին գործերի նախարարների խորհրդի նիստը: Անդամ երկրների պատվիրակությունների ղեկավարներին և ՀԱՊԿ գլխավոր քարտուղարին ընդունեց ՀԱՊԿ Հավաքական անվտանգության խորհրդի նախագահ, Հանրապետության նախագահ Սերժ Սարգսյանը:ՀԱՊԿ ԱԳՆԽ նիստն անցկացվել է ՀՀ արտգործնախարարի նախագահությամբ, որի ընթացքում քննարկվել է ծայրահեղականության դեմ պայքարը ու ՀԱՊԿ անդամ երկրներին սպառնացող հակամարտ և ճգնաժամային գոտիներում տիրող իրավիճակը: Սիրիական ճգնաժամի և ԼՂ հակամարտության վերաբերյալ հայտարարություններ են ընդունվել:
