Քերին Չավուշօղլուի հետ քննարկել է Թուրքիայում խոսքի ազատության հետ կապված վիճակը
ԱՄՆ պետքարտուղար Ջոն Քերին Բրյուսելում այսօր հանդիպել է Թուրքիայի արտգործնախարար Մևլյութ Չավուշօղլուի հետ, որի ժամանակ քննարկվել են Սիրիան և Իրաքը, ինչպես նաև Թուրքիայում խոսքի ազատության հետ կապված վիճակը, հայտնում է ԱՄՆ պետդեպարտամենտը:
«Նախարարները քննարկել են Սիրիայում իրավիճակը՝ ընդգծելով այն անհրաժեշտությունը, որ Սիրիայում կրակի դադարեցման ռեժիմին հետևեն բոլոր կողմերը ու իրենց ավանդն ունենան իշխանության փոխանցման քաղաքական գործընթացին»,- հայտնել է Պետդեպը:
Հանդիպմանը կողմերը քննարկել են նաև Իրաքում և տարածաշրջանում ԴԱԻՇ-ի դեմ կոալիցիան, ինչպես նաև միջազգային ջանքերը՝ կապված փախստականների հետ կապված ճգնաժամի դեմ պայքարում:
«Պետքարտուղարը նաև քննարկել է խոսքի և ազատ ու անկախ ԶԼՄ-ների կարևորությունը»,- հայտնել է Պետդեպարտամենտը:
Թուրքիայում վերջին ամիսներին փակվել կամ պետության վերահսկողության տակ են անցել մի շարք ազդեցիկ լրատվամիջոցներ:
