35 սկսնակ ընկերություն մասնակցում է Հայաստան-ԱՄՆ ՏՏ ոլորտի աքսելերացիոն ծրագրին
35 սկսնակ ընկերություն ներկայումս մասնակցում է Հայաստան-ԱՄՆ ՏՏ ոլորտի աքսելերացիոն ծրագրին, որի նպատակն է՝ օգնել ՏՏ ոլորտի հայաստանյան ընկերություններին՝ գործարար կապեր հաստատել Սիլիկոնային հովտում և հաջողությունների հասնել արտասահմանյան շուկայում: Հայաստան-ԱՄՆ ՏՏ ոլորտի աքսելերացիոն ծրագիրն իրականացնում են Ձեռնարկությունների ինկուբատոր հիմնադրամը (ՁԻՀ), Հայաստանի Հանրապետության կառավարությունը և Համաշխարհային բանկը՝ Ձեռներեցության զարգացման և ղեկավարների վերապատրաստման կենտրոն (CEED) հիմնադրամի համագործակցությամբ:
Ծրագրին մասնակցության հայտ էր ներկայացրել 73 ընկերություն, որոնցից ընտրվել են 35 Տեղեկատվական տեխնոլոգիաների ոլորտի նորաստեղծ և նոր լուծումներ առաջարկող ընկերությունները:
Նախնական փուլն անցած ընկերությունները մասնակցում են 6 շաբաթ տևողությամբ աքսելերացիոն ծրագրի հայաստանյան փուլին, որն իր մեջ ներառում է դասընթացներ, խորհրդատվություն և գաղափարներ ներկայացնելու կարողությունների զարգացման հմտություններ:
Հայաստանի և արտերկրի հաջողակ ձեռներեցները և փորձագետները հայ սկսնակներին ներկայացնում են բիզնես մոդելի առաջխաղացման, շուկայում ներկայանալու ռազմավարության մշակման, արտասահմանյան ներդրողների և հաճախորդների հետ աշխատելու հմտությունների ձեռքբերման, ինչպես նաև հետագա քայլերի պլանավորման նրբությունները:
Աքսելերացիոն ծրագրի ավարտին՝ մայիսի 14-ին, կանցկացվի Դեմո օր, որի ընթացքում հայաստանյան փուլն անցած ընկերություններից կընտրվի 5-ը, ովքեր կմասնակցեն 2016 թվականի հունիսին Սիլիկոնային հովտում կայանալիք՝ Հայաստանի ՏՏ ոլորտի սկսնակ ընկերություններին նվիրված համաժողովին: Մասնակիցները հնարավորություն կունենան աշխատելու նաև CEED-ի համաշխարհային ցանցի անդամ հանդիսացող գործարարների և ներդրողների հետ:
